Fréttir

Sindri Kristjánsson nýr oddviti Samfylkingar

Skapti Hallgrímsson - skapti@akureyri.net 14.03.2026 kl. 14:00

Sindri S. Kristjánsson, skrifstofustjóri, er nýr oddviti Samfylkingarinnar á Akureyri. Framboðslisti flokksins fyrir komandi bæjarstjórnarkosningar var samþykktur samhljóða á félagsfundi í hádeginu í dag.

„Það er mér ofboðslegur heiður að hljóta traust félaga minna í Samfylkingunni á Akureyri til að leiða lista framboðsins í bæjarstjórnarkosningunum í vor. Listinn er ótrúlega öflugur, bæði fjölbreyttur en traustur í senn,“ segir Sindri í tilkynningu frá Samfylkingunni. Hann er varabæjarfulltrúi yfirstandandi kjörtímabili.

„Með þessum lista sendum við skýr skilaboð til bæjarbúa. Við ætlum að setja menntamál og velferðarmál rækilega á oddinn ásamt að ungum Akureyringum er treyst til ábyrgðar og verka. Verkefnið framundan er stórt en það er jafnframt spennandi og skemmtilegt. Jafnaðarfólk á Akureyri er mætt til leiks,“ segir Sindri.

„Hilda Jana Gísladóttir, sem var oddviti flokksins í síðustu kosningum og bæjarfulltrúi framboðsins á líðandi kjörtímabili, sat í uppstillingarnefnd sem lagði fram tillögu að lista. Á fundinum voru Hildu þökkuð afar vel unnin störf sl. átta ár í bæjarstjórn Akureyrar,“ segir í tilkynningunni.