Opinn fundur mbl.is og Morgunblaðsins

Blaðamenn Morgunblaðsins og mbl.is eru á kosningaferðalagi um landið í aðdraganda sveitarstjórnarkosninga og halda opna borgarafundi hér á þar. Í kvöld verða þeir á Græna hattinum á Akureyri og þangað eru allir velkomnir. Fundurinn hefst kl. 20.00 en húsið verður opnað kl. 19.30.

„Á fundinum munu oddvitar og bæjarstjóraefni efstu sex framboðanna (miðað við nýjustu skoðanakannanir) kynna sig, helstu áherslumál sín og stefnuskrá flokka sinna fyrir bæjarbúum. Umræðum verður stýrt af blaðamönnunum Andrési Magnússyni og Stefáni Einari Stefánssyni,“ segir í tilkynningu frá Árvakri, útgáfufélagi Morgunblaðsins og mbl.is

„Markmið fundarins er að skapa vettvang fyrir íbúa til að kynna sér helstu áherslur og málefni, sem snúa að sveitarfélaginu, auk þess sem tækifæri gefst til að spyrja spurninga og taka þátt í umræðum um framtíð bæjarins,“ segir í tilkynningunni. „Allir bæjarbúar og nærsveitungar eru hvattir til að mæta og taka virkan þátt í lifandi og lýðræðislegri umræðu í aðdraganda kosninga.“