Fara í efni
Fréttir

Afmælisbarnið gaf hálfa milljón króna

Aðalbjörn Pálsson, gjaldkeri Bergs, Jóhannes Bjarnason, formaður Hollvinasamtakanna, Rögnvaldur Snor…
Aðalbjörn Pálsson, gjaldkeri Bergs, Jóhannes Bjarnason, formaður Hollvinasamtakanna, Rögnvaldur Snorrason, formaður Bergs og Ingibjörg Jóhannesdóttir, skrifstofustjóri Bergs. Ljósmynd: Skapti Hallgrímsson.

Hollvinasamtökum Sjúkrahússins á Akureyri voru færðar 500.000 krónur að gjöf í gær, í tilefni stórafmælis gefandans. Berg, félag stjórnenda á Norðurlandi eystra varð þá 80 ára og hafði stjórn félagsins ákveðið að styðja við gott málefni í nafni félagsmanna í stað þess að fagna afmælinu með hefðbundnum hætti.

Jóhannes Gunnar Bjarnason, formaður Hollvinasamtakanna, mætti á skrifstofu Bergs og tók við gjöfinni, þakklátur mjög, og lýsti því yfir – sem enginn efast um – að peningarnir komi í góðar þarfir. Eins og fram kom á Akureyri.net á dögunum færðu Hollvinsamtökin Sjúkrahúsinu á Akureyri tæki og tól fyrir hvorki meira né minna en 100 milljónir króna á síðasta starfsári.

Berg, félag stjórnenda á Norðurlandi eystra hét upphaflega Verkstjórafélag Akureyrar og nágrennis en nafninu var breytt 2012.