Fyrsta farþegaskipið við Torfunefsbryggju

Fyrsta farþegaskipið lagðist að hinni nýju Torfunefsbryggju um klukkan 22 í gærkvöldi, hið franska Le Champlain, og setur það óneitanlega mikinn svip á miðbæinn. Um borð er rými fyrir 120 farþega og 112 eru í áhöfn.

Bryggjan var formlega tekin í notkun á miðvikudaginn þegar togarinn Björg EA lagðist þar að. Gert ráð fyrir að „minni skemmtiferðaskip“ leggist alls níu sinnum til viðbótar að Torfunefsbryggju í ár, þar af Le Champlain tvisvar í næsta mánuði. Önnur skip verða við Torfunef þrisvar í ágúst, jafn oft í september og einu sinni í október.

Le Champlain er um 130 metra langt og segja má að það smellpassi við Torfunefsbryggjuna. Áætluð brottför er klukkan 16 í dag.

Með því að smella hér má sjá hvað vefmyndavél skipsins býður upp á hverju sinni. Íbúar Akureyrar, og vitaskuld margir aðrir, kannast vel við útsýni dagsins.