VMA og Iðavöllur á meðal tilnefndra

Verkmenntaskólinn á Akureyri er tilnefndur til Íslensku menntaverðlaunanna, sem og verkefni sem leikskólinn Iðavöllur á Akureyri tekur þátt í ásamt fleiri leikskólum. Þriðja tilnefningin sem tengist Akureyri er Söngvavor, sem Tónlistarskólinn á Akureyri og leikskólar bæjarins taka þátt í.

Verkmenntaskólinn er tilnefndur í flokknum iðn- og vekrmenntir ásamt tveimur öðrum. Verkefnið sem skólinn er tilnefndur fyrir er „sjálfbær kennslustofa, nýsköpunarverkefni sem er til fyrirmyndar um markvissa umhverfismennt – en í Verkmenntaskólanum á Akureyri hefur verið sett upp sólarorkuver og aðstaða sköpuð til að fást við margs konar verkefni sem því tengjast.“ Fjallað var um þetta verkefni VMA í fréttum Rúv í vor - sjá hér.

Þrjú verkefni eru tilnefnd í flokki þróunarverkefna, þar á meðal Stilla – hæglátt skólastarf þar sem leikskólinn Iðavöllur á Akureyri er á meðal þátttakenda. Stilla „er samvinnuverkefni rannsakenda og starfsfólks í fjórum leikskólum, Aðalþingi í Kópavogi, Iðavelli á Akureyri, Rauðhóli í Reykjavík og Uglukletti í Borgarnesi, um að gefa börnunum tækifæri til að sökkva sér í leik og gefa þeim meiri tíma til að kanna hugmyndir sínar.“

Annað verkefni í sama flokki tengist einnig Akureyri. Það er Söngvavor: Samstarf um tónlistaruppeldi, málrækt og jöfn tækifæri barna. Tónlistarskólinn á Akureyri og leikskólar bæjarins eru á meðal þátttakenda í Söngvavori, samstarfsverkefni leikskóla og tónlistarskóla. Leikskólabörnin læra sönglög eftir íslensk tónskáld, heimsækja tónlistarskóla og æfa með hljómsveitum þeirra. Verkefninu lýkur með mikilli tónlistarhátíð þar sem börnin koma fram fyrir áheyrendur.

Það eru Samtök áhugafólks um skólaþróun sem standa að Íslensku menntaverðlaununum, en sérstakt viðurkenningarráð hefur umsjón með tilnefningum. Verðlaunin voru endurreist árið 2020 og verður komandi verðlaunaveiting því sú sjöunda á þessu formi. 

Allar tilnefningar má sjá í frétt á vef Skólaþróunar - sjá hér.

Fréttin hefur verið uppfærð.