Gervigreind - pistlar

Mjög mikið álag á bráðamóttöku SAk

Skapti Hallgrímsson skrifar 18. desember 2025 | kl. 15:55

Mjög mikið álag er á bráðamóttöku Sjúkrahússins á Akureyri (SAk) þessa dagana og stofnunin biðlar til fólks um að leita ekki þangað nema brýn þörf sé á. „Í vafatilfellum skal hringja í upplýsingasímann 1700,“ segir í tilkynningu frá SAk í dag.

„Það er mjög mikið álag hjá okkur núna og mjög mikilvægt að minna á að minna veikir og fólk með langvarandi einkenni leiti til heilsugæslunnar, svo að starfsfólk hér hafi tök á að sinna bráðveikum og slösuðum. Biðin getur verið mjög löng núna. Þá er mikilvægt að undirstrika að hér er grímuskylda og einvörðungu einn aðstandandi með sjúklingi, sé þörf á því.“ segir Kristín Ósk Hólm Ragnarsdóttir, deildarstjóri á bráðamóttöku SAk.

Jón Pálmi Óskarsson, yfirlæknir á bráðamóttöku SAk, bendir á að ákaflega mikilvægt sé að greina á milli þess hvort æskilegt sé að leita á bráðamóttöku eða heilsugæslu. „Þau sem leita á bráðamóttöku verða metin af reyndum hjúkrunarfræðingi eins fljótt og mögulegt er. Þeim sem hjúkrunarfræðingur metur ekki í þörf fyrir bráðameðferð verður beint á heilsugæsluna.“ segir Jón Pálmi enn fremur.

Hér má finna almennar leiðbeiningar um hvert skal leita, á heilsugæslu eða á bráðamóttöku:

https://view.officeapps.live.com/op/view.aspx...

Á Heilsuveru eru ítarlegar upplýsingar um ýmsa sjúkdóma og gagnlegar ráðleggingar varðandi veikindi barna og fullorðinna. Nánari upplýsingar í tengslum við inflúensu má nálgast hér: https://www.heilsuvera.is/.../sjukdomar-fravik.../influensa/

Til baka í yfirlit