Hafdís Íslandsmeistari í malarhjólreiðum

Hafdís Sigurðardóttir úr Hjólreiðafélagi Akureyrar bætti enn einum Íslandsmeistaratitlinum í safnið í dag þegar hún vann Íslandsmótið í malarhjólreiðum annað árið í röð. Hafdís kom í mark með rúmlega þremur mínútum betri tíma en næsti keppandi í kvennaflokki. 

Hjólaðir voru 123 kílómetrar á malarvegum Strandasýslu í Strandir Gravel hjólreiðakeppninni, sem jafnframt var Íslandsmót í greininni. Hafdís hjólaði vegalengdina á fjórum tímum, 18 mínútum og 33 sekúndum.

Lagt var af stað frá Hótel Laugarhóli í Bjarnarfirði og hjólað að Gjögri þar sem snúið var við og hjólað sömu leið til baka að Laugarhóli. Skráðir keppendur voru 38, sjö í kvennaflokki og 31 í karlaflokki. 

Fjórir keppendur úr Hjólreiðafélagi Akureyrar spreyttu sig á mölinni á Ströndum. Auk Hafdísar voru það Sóley Svansdóttir sem endaði í 5. sæti í kvennaflokki, Harpa Mjöll Hermannsdóttir sem varð í 7. sæti í kvennaflokki og Rögnvaldur Már Helgason sem varð í 14. sæti í karlaflokki. Fimmti Akureyringurinn, Bríet Kristý Gunnarsdóttir sem keppir fyrir Tind, varð í 3. sæti í kvennaflokki.

Þrír efstu í hvorum flokki:

• Elite flokkur kvenna
  1. Hafdís Sigurðardóttir
  2. Andrea Kolbeinsdóttir
  3. Bríet Kristý Gunnarsdóttir
• Elite flokkur karla
  1. Ingvar Ómarsson
  2. Hafsteinn Geirsson
  3. Baldur Þorkelsson

Smellið á hvorn flokk fyrir sig til að sjá öll úrslit í flokkunum.