Rúm milljón til KAON eftir bleika leikinn

Nokkrir leikmenn SA Víkinga, karlaliðs Skautafélags Akureyrar í íshokkí, afhentu í dag fulltrúum Krabbameinsfélags Akureyrar og nágrennis 1.150 þúsund krónur, sem er afrakstur bleika leiksins eða hundrað krónu leiksins, viðureignar SA og SR síðastliðinn laugardag þar sem áhorfendum gafst kostur á frjálsum framlögum. 

Hokkístrákarnir mættu með prentaða risaávísun með áletraðri upphæð, 1.075.000 kr., en framlög héldu áfram að berast inn á söfnunarreikninginn eftir að ávísunin var prentuð og endanleg upphæð því 75.000 krónum hærri en þar stendur. 

Í pistli á Facebook-síðu íshokkídeildarinnar er öllum þeim sem mættu, keyptu happdrættismiða, tóku þátt í pökkakasti eða lögðu sitt af mörkum færðar innilegar þakkir, ásamt tveimur fyrirtækjum, Eltech ehf. og Múrey ehf., sem studdu við þetta verkefni félagsins.