Gefa „framlínufólkinu“ alls 2000 páskaegg

Sjúkrahúsinu á Akureyri bárust í gær um 1.100 páskaegg að gjöf, handa starfsfólki stofnunarinnar og sjúklingum. Það er Smáríkið, netverslun með áfengi, sem gefur.

 

Axel Birgisson, rekstrarstjóri Smáríkisins, birti myndskeið á Instagram í gær þar sem hann tilkynnti að fyrirtækið hefði keypt 2.000 páskaegg frá Nóa Síríus sem gefin yrðu „framlínufólkinu“ – starfsmönnum sjúkrahússins, slökkviliðsins, björgunarsveitafólki og fleirum.

 

„Í gær barst Sjúkrahúsinu á Akureyri rausnarleg gjöf frá Smáríkinu þegar um 1.100 páskaegg voru afhent til að gleðja bæði starfsfólk og skjólstæðinga yfir páskahátíðina,“ segir á Facebook síðu sjúkrahússins þar sem meðfylgjandi myndir eru birtar. „Smáríkið vildi með þessu sýna stuðning við starfsemi SAk og færa smá páskagleði inn í daglegt líf þeirra sem hér starfa og dvelja. Við kunnum Smáríkinu innilega þakkir fyrir hlýhugann og óskum þeim sem og öllu starfsfólki SAk gleðilegra páska.“