Umhverfis- og loftslagsstefna Akureyrarbæjar

Akureyrarbær hefur sett sér umhverfisstefnu.

Á heildina litið finnst mér stefnan líta vel út. Þar er fjallað um fjölbreytt viðfangsefni í nokkrum köflum og henni fylgir aðgerðaáætlun.

Í þetta skiptið beini ég athyglinni að 5. kaflanum sem ber titilinn „Náttúra og græn svæði“.

Í lokaorðum inngangsins að kaflanum segir:

„Bæjarstjórn telur mikilvægt […] að varðveita hin fjölbreyttu náttúrusvæði í bæjarlandinu, vernda líffræðilegan fjölbreytileika, vinna markvisst gegn útbreiðslu ágengra plantna, bæta vöktun, aðgengi að náttúru og umgengni um hana, stuðla að verndun og endurheimt vistgerða og vistkerfa auk þess að stuðla að frekari skógrækt og bættri landnýtingu.“

Hins vegar, þegar kemur að því að skoða hvernig gengur að fylgja þessari stefnu eru atriði sem ég tel að þurfi að vinna betur á næstu misserum.

Til að stefnan verði trúverðug þarf að taka betur á tilteknum málum. Þar má nefna utanvegaakstur utan formlegra aksturssvæða í mynni Glerárdals, ólöglegri framræslu gulstararflóa í landi Akureyrar á Óshólmasvæðinu og vinnu á Glerárdal sem þarf að vera í samræmi við framkvæmdalýsingu í anda friðlýsingarskilmála dalsins.

Það þarf líka að endurnýja framkvæmdaáætlun um vinnu gegn ágengum plöntum í bæjarlandinu og taka upp skipulegri ástandsvöktun til viðbótar því sem er vel unnið í fuglatalningunum.

Í upphafi 6. kafla segir:

„Akureyrarbær hefur lengi verið í fararbroddi í umhverfis- og loftslagsmálum á Íslandi. Mikilvægt er að halda áfram að styrkja þá stöðu og ímynd Akureyrar sem bæjarbúar geta verið stoltir af.“

Ég skora á þau sem fá það verkefni að stýra aðgerðum næstu ára að láta verkin tala, svo fullyrðingin um forystu Akureyrarbæjar í umhverfismálum verði ekki aðeins falleg orð á blaði.

Ólafur Kjartansson er áheyrnarfulltrúi VG í Umhverfis- og mannvirkjaráði Akureyrarbæjar