Þór vann Fjölni og tók forystu í einvíginu

Þórsarar unnu Fjölni 29:27 á útivelli í kvöld í úrslitum umspils um sæti í efstu deild Íslandsmótsins í handbolta næsta vetur.

Þetta var þriðja viðureign liðanna og Þórsarar hafa tekið forystu; staðan er 2:1 og sigri þeir Fjölnismenn í Höllinni á Akureyri á mánudagskvöldið er sæti í Olísdeildinni tryggt. Ekki skyldi þó vanmeta lið Fjölnis og eins gott að leikmenn Þórs og stuðningsmenn mæti grimmir til næsta leiks.

Liðin buðu upp á hörkuleik í kvöld í Fjölnishöllinni, sal sem er hluti af Egilshöll í Grafarvogi. Töluverðar sveiflur voru í leiknum; heimamenn byrjuðu betur en Þórsarar skiptu um gír þegar leið á fyrri hálfleikinn og höfðu þriggja marka forystu að honum loknum, 15:12.

Þórsarar héldu sínu striki í upphafi seinni hálfleiks, en reyndar aðeins í stutta stund. Þeir gerðu fyrsta markið en þá hrukku Fjölnismenn í gang og gerðu fimm mörk í röð; komust í 17:16 og skömmu síðar í 19:17.

Þegar seinni hálfleikurinn var hálfnaður höfðu heimamenn þriggja marka forskot, 24:21. Halldór Þórsþjálfari greip þá til þess ráðs að taka leikhlé og það svínvirkaði. Þórsarar gerðu næstu fjögur mörk, komust yfir á ný og léku vel lengstum það sem eftir lifði leiks. En spennan hélst allt til loka. Aron Hólm kom Þór í 28:27 með marki úr vítakasti og gerði síðasta markið skömmu síðar eftir hraðaupphlaup.

Mörk Þórs: Aron Hólm Kristjánsson 8, Brynjar Hólm Grétarsson 6, Arnór Þorri Þorsteinsson 6, Sveinn Aron Sveinsson 3, Þormar Sigurðsson 2, Jón Ólafur Þorsteinsson 1, Garðar Már Jónsson 1, Halldór Kristinn Harðarson 1, Arnþór Gylfi Finnsson 1.

Varin skot: Kristján Páll Steinsson 15.

Smellið hér til að sjá leikskýrsluna