Þjónustufall á landsbyggðinni í skugga uppsagna ferliverkasamninga, hvað þarf til að stjórnvöld bregðist við?

Staðan á Sjúkrahúsinu á Akureyri er alvarleg en rétt er að greina frá því að hún er margþætt og á sér lengri aðdraganda en uppsagnir ferliverkasamninga eins og hefur verið til umræðu í fjölmiðlum. Þetta hefur áhrif á heilbrigðiskerfið í heild sinni en ekki einungis upptökusvæði SAk og snertir því augljóslega öryggi sjúklinga víða. Athyglin virðist öll á ferliverkasamningum en fátt annað heyrist opinberlega. Víðtækur, kerfislegur og alvarlegur vandi i lengri tíma en uppsagnir ferliverkasamninga án annarra raunhæfra lausna fylltu mælinn. Manneklan og lítil endurnýjun í sérgreininni fyrir norðan ofan á aukna eftirspurn gera aðstæður sjúkrahússins erfiða. Nýtilkomnar kjarabætur lækna með samningum frá því i vor hafa reynst óraunhæfar i framkvæmd á stórri einingu eins og innan lyflækninga á SAk. Þar eru örfáir sérfræðingar sem sinna sérhæfðri og fjölbreyttri þjónustu á öllum tímum sólarhringsins. Aðkoma heilbrigðisráðuneytis að lausnum er óhjákvæmileg til að komast úr núverandi krísu Sjúkrahússins á Akureyri og svæðisins.