Umræðan

Skapa sterka ímynd og sérstöðu

Skapti Hallgrímsson skrifar 03. apríl 2025 | kl. 12:40

Ingibjörg Berglind Guðmundsdóttir (Begga), listrænn stjórnandi og Katrín Árnadóttir markaðsráðgjafi - stofnendur Komplíments.

Komplíment er nýstofnuð markaðs- og ráðgjafastofa á Akureyri sem veitir fyrirtækjum og stofnunum faglega aðstoð við að efla ímynd sína og markaðsstarf. Teymið samanstendur af reynslumiklum sérfræðingum í markaðsmálum, almannatengslum og hönnun, segir í kynningu á Komplíment.

Komplíment er eitt sex nýsköpunarverkefna sem Drift^EAvaldi í svokallaðan Hlunn og fá þau verkefni heildstæða aðstoð og ráðgjöf næstu 12 mánuði
Akureyri.net kynnir umrædd verkefni um þessar mundir, eitt í viku hverri. Grænafl var til umfjöllunar í síðustu viku en áður hafði verið fjallað ítarlega um verkefnið ÍBA 55+

Drift^EAer miðstöð frumkvöðla og nýsköpunar sem tók starfa á Akureyri í vetur
Alls fengu 14 verkefni inngöngu fyrr í vetur í nýsköpunarhraðal sem nefnist Slipptaka. Næsta skrefið að Slipptöku lokinni er Hlunnurinn sem er að sænskri fyrirmynd en Drift^EA er í samstarfi við sænska frumkvöðlasetrið Sting

„Við munum fyrst um sinn einbeita okkur að því að lyfta undir með fyrirtækjum á svæðinu með verkefni sem sitja á hakanum. Þetta eru oft verkefni eins og uppfærsla vefsíðu og innihaldsrík efnissköpun fyrir samfélagsmiðla en einnig grafísk vinnsla efnis sem endurspeglar sérstöðu fyrirtækisins,“ segir Katrín Árnadóttir, sem stofnaði fyrirtækið ásamt Ingibjörgu Berglindi Guðmundsdóttur.

Katrín hefur áralanga reynslu af markaðsstarfi bæði sem forstöðumaður markaðs- og kynningarmála hjá Háskólanum á Akureyri og sem samskiptafulltrúi Sjúkrahússins á Akureyri, og Ingibjörg Berglind – alltaf kölluð Begga – hefur starfað sem grafískur hönnuður og teiknari í fjöldamörg ár.

Ingibjörg Berglind Guðmundsdóttir (Begga), til vinstri, listrænn stjórnandi og Katrín Árnadóttir markaðsráðgjafi - stofnendur Komplíments

Ímyndarsköpun er viðleitni til að stýra því hvernig umheimurinn sér einstakling, vöru, fyrirtæki eða stofnun, segja þær stöllur. Begga, listrænn stjórnandi Komplíments, þekkir það mjög vel: „Með vandaðri hönnun er hægt að skapa sterka ímynd og sérstöðu fyrir fyrirtæki og stofnanir sem stuðlar að auknu trausti og viðurkenningu samfélagsins,“ segir hún.

Katrín bjó í Þýskalandi í um 16 ár, fyrst við nám í fjölmiðlafræði og síðan vann hún í sendiráði Íslands í Berlín. Þá starfaði hún við heiðursþátttöku Íslands á bókamessunni í Frankfurt áður en hún stofnaði leiðsögufyrirtækið Berlínur ásamt Margréti Rós Harðadóttur.

Begga stofnaði cave canem hönnunarstofu með eiginmanni sínum Finni Dúa Sigurðssyni árið 2018 og hefur átt farsælan feril í hönnun. Hún er menntaður tækniteiknari og grafískur hönnuður og hefur unnið fyrir fyrirtæki og stofnanir um allt land. Þá er Begga einnig teiknari sem gefur henni og Komplíment mikla sérstöðu á markaðnum auk þess sem hún hefur tekið að sér að vera stílisti fyrir auglýsingar.

Komplíment – heimasíðan

Til baka í umræðuna