Umræðan

Rafael Victor verður ekki áfram með Þór

Skapti Hallgrímsson skrifar 11. október 2025 | kl. 12:30

Rafael Victor í síðasta leiknum með Þór; þegar Þórsarar sigruðu Þrótt 2:1 í Reykjavík og tryggðu sér sæti í Bestu deildinni. Mynd: Skapti Hallgrímsson

Framherjinn Rafael Victor verður ekki í herbúðum knattspyrnuliðs Þórs næsta sumar, þegar Þórsarar leika í efstu deild Íslandsmótsins á ný eftir 11 ára fjarveru. Tveggja ára samningur hans rennur út um næstu áramót og félagið hefur tilkynnt Rafa að honum verði ekki boðinn nýr samningur.

Rafa lék tvö keppnistímabil með Þór. Hann gerði 9 mörk í 19 leikjum sumarið 2024 í Lengjudeildinni, næst efstu deild Íslandsmótsins, og 4 mörk í 14 leikjum í sumar. Rafa var meiddur allan síðasta vetur og hóf ekki að leika með liðinu fyrr en í lok júní.

Rafael Victor er 29 ára Portúgali. Hann lék fyrst á Íslandi 2019, með Þrótti í Reykjavík. Rafa lék með Hetti/Hugin 2022 og Njarðvík 2023, áður en hann samdi við Þór. Ekki liggur fyrir hvert leið framherjans liggur næst.

Til baka í umræðuna