Bjarni Ófeigur til 2028, ungur Dani til Þórs

Bjarni Ófeigur Valdimarsson framlengdi í gær samning við handknattleiksdeild KA um tvö ár og er nú samningsbundinn félaginu til vors 2028. Þá tilkynnti handknattleiksdeild Þórs að samið hefði verið við danskan rétthentan miðjumann og skyttu, og öflugan varnarmann, Bertram Simonsen sem kemur frá danska félaginu Lemvig Thyborøn.

„Bjarni sem er 27 ára gamall er að leika sitt annað tímabil með KA og var hann þriðji markahæsti leikmaður Olísdeildarinnar með 147 mörk auk þess að vera langflestar stoðsendingar í deildinni eða 122 talsins. Ekki nóg með að fara fyrir sóknarleiknum þá er Bjarni algjör lykilmaður í öflugum varnarleik KA liðsins, þess má geta að Bjarni var lengi vel markahæsti leikmaður deildarinnar en vegna meiðsla á fingri missti hann af nokkrum leikjum,“ segir í tilkynningu á vef KA.

Í tilkynningu á vef Þórs segir um Danann: „Bertram er rétthentur miðjumaður/vinstri skytta og öflugur varnarmaður fæddur árið 2004 í Herning, Danmörku og spilaði hann með yngri flokkum Herning FH og Skanderborg ásamt því að hafa spilað með yngri landsliðum Danmörku. Bertram hefur leikið með Lemvig undanfarin tvö ár en spilaði þar áður með HC Midtjylland.“

• Af vef KA: Bjarni Ófeigur framlengir út 2028
• Smellið á myndina að neðan til að hlýða á skilaboð Bertrams til Þórsara