Bæjarslagur, spyrna og alls konar hlaup

Íþróttaviðburðir vikunnar eru af stærra taginu, bæði í augum þeirra sem keppa og þeirra sem fylgjast með og styðja sitt fólk. Annars vegar er bæjarslagur í karlafótboltanum í kvöld, mánudagskvöld, og hins vegar ofurhlaupið Súlur Vertical á laugardag og er þetta í 11. sipti sem hlaup fer fram. Að auki heimsækja konurnar í fótboltanum ríkjandi Íslandsmeistara í Kópavoginn um miðja vikuna. Hlaupavikan er líka alls konar því áður en kemur að ofurhlaupinu verður hlaupið í sumarkjólum með freyðivín á fimmtudag og svo hlaupa krakkarnir í Kjarnaskógi á föstudag.

MÁNUDAGUR 27. JÚLÍ - fótbolti

Það hefur varla farið framhjá knattspyrnuáhugafólki á Akureyri að bæjarslagur er á dagskránni í kvöld þegar karlalið Akureyrar í Bestu deildinni, KA og Þór, mætast. Þetta er seinni leikur liðanna í mótinu fyrir tvískiptingu, en KA vann fyrri leikinn á nýjum Þórsvelli, VÍS-vellinum, í byrjun maí með einu marki gegn engu.

• Besta deild karla í knattspyrnu, 16. umferð
  Greifavöllurinn, nýr gervigrasvöllur vestan við KA-heimilið, kl. 19:15
  KA - Þór

Bæði liðin eru að berjast við að forðast fall úr deildinni. Að loknum 15 umferðum er KA í 10. sæti deildarinnar með 14 stig, en Þór í 12. sætinu með 11 stig. 

Nánar er fjallað um bæjarslaginn í viðtölum og öðrum greinum á akureyri.net í dag og í gær.

• Snýst ekki sérstaklega um stöðuna í deildinni
• Ætlum að vinna aftur og skilja okkur frá botninum

MIÐVIKUDAGUR 29. JÚLÍ - fótbolti

Þegar öll liðin í Bestu deild kvenna hafa spilað 12 leiki situr Þór/KA í 8. sætinu með 12 stig og komst úr fallsæti í fyrsta skipti frá því í upphafi móts með sigri á ÍBV í síðasta leik. Keppni í neðri hluta deildarinnar er gríðarlega jöfn og spennandi og munar aðeins fimm stigum á liðinu í 5. sæti, sem er Grindavík/Njarðvík, og liðinu í 10. sæti, sem er Víkingur. Ásamt Víkingi er Valur í fallsæti með tíu stig, þar fyrir ofan er Þór/KA með 12, Fram og Þróttur með 13 stig og Grindavík/Njarðvík með 15.

Hjá Þór/KA er komið að heimsókn í Kópavoginn, en Breiðablik er í 2. sæti deildarinnar með 27. stig. Þessi lið mættust á Akureyri í maí og hafði Breiðablik þar betur, 3-1. 

• Besta deild kvenna í knattspyrnu, 14. umferð
  Kópavogsvöllur kl. 18
  Breiðablik - Þór/KA

FIMMTUDAGUR 30. JÚLÍ - hlaup

Mögulega er spurning hvort hlaupið á fimmtudag á heima í íþróttavikunni eða menningarvikunni, líklega hvoru tveggja. 

• Kjarnaskógur kl. 17
  Sumarkjóla- og freyðivínshlaup

Þátttakendur hittast á planinu við Kjarnakot og er farinn einn hringur, 2,2 kílómetrar, en þátttakendur mega fara lengra, hver á sínum hraða, hlaupið, skokkað, gengið. Upplýsingar um hlaupið má finna á síðu viðburðarins á Facebook.

FÖSTUDAGUR 31. JÚLÍ - hlaup

• Kjarnaskógur kl. 16
  Krakkahlaup Súlur Vertical

LAUGARDAGUR 1. ÁGÚST - hlaup

Fjallahlaupið Súlur Vertical hefur sannarlega fest sig í sessi sem eitt af vinsælustu ofurhlaupunum á Íslandi. Hlaupið fer fram á laugardag um veslunarmannahelgina. Fyrsta hlaupið fór fram 2016 og hefur verið hlaupið á hverju ári nema 2020. 

Boðið er upp á fjórar mismunandi hlaupaleiðir og vegalengdir, 19, 29, 43 og 100 km. Þrjú styttri hlaupin hefjast í Kjarnaskógi en 100 km hlaupið hefst við Goðafoss. Endamark er í miðbæ Akureyrar þar sem hlauparar koma niður Brekkugötuna síðustu metrana. 

Allar upplýsingar um hlaupið má finna á vef hlaupsins, sulurvertical.is þaðan sem upplýsingarnar hér að neðan eru fengnar, en nákvæmari leiðalýsingar er að finna á vef hlaupsins. Örlítið misræmi er í textaupplýsingum og kortaupplýsingum um vegalengdir og hækkanir. Fyrstu keppendur í öllum vegalengdunum koma í mark í miðbæ Akureyrar um hádegisbil, en keppendur eru svo að koma í mark allan daginn. Endamarki verður lokað kl. 19.

Auk fjallahlaupsins er boðið upp á Þríleikinn. Í Þríleiknum er skíðagöngukeppni, malarhjólreiðar og svo fjallahlaupið sem fram fer um verslunarmannahelgina. Skíðagöngukeppnin fór fram 29. febrúar og á rætur að rekja til Hermannsgöngunnar, en tvær leiðir þar, Mjöll og Bylur, teljast með í þríleikskeppninni. Hjólreiðafélag Akureyrar sér um hjólreiðahluta þríleiksins og fer hann fram laugardaginn 8. ágúst.

Vakin er athygli á götulokunum og umferðarstýringum í tengslum við hlaupið, sjá hér neðar.

• Fálkinn - 19 km - 530 m hækkun
  Byrjar í Kjarnaskógi, hlaupið upp í Fálkafell og niður í miðbæ.
  Ræsing kl. 11:30
  
• Súlur 29 km - 1.410 m hækkun
  Byrjað í Kjarnaskógi, farið upp á Súlur og niður aftur, þaðan niður í miðbæ.
  Ræsing kl. 10
  
• Tröllið - 43 km - 1.870 m hækkun
  Byrjað í Kjarnaskógi, báðir Súlutindar, Krummi, Litli Krummi, Lambárdalur, Lambárjökull, Lambáröxl, Glerárdalur, Lambi, niður Glerárdal og niður í miðbæ.
  Ræsing: 8:00
  
• Gyðjan - 100 km - 3.580 m hækkun
  Byrjað við Goðafoss, hlaupið um Bárðardal, yfir Belgsárfjall, um Fnjóskadal, um Þórðarstaðaskóg, Lundsskóg, Vaglaskóg, um Systragil, Þingmannaleið, Vaðlaheiði, yfir gömlu brýrnar á Eyjafjarðará, í Kjarnaskóg, upp í Gamla og Fálkafell, báðir Súlutindar, Krummi, Litli Krummi, Lambárdalur, Lambárjökull, Lambáröxl, Glerárdalur, Lambi og áfram niður Glerárdalinn og niður í miðbæ Akureyrar.
  Ræsing kl. 21 (föstudagskvöld) - fyrri hópur, hlauparar með innan við 600 ITRA stig
  Ræsing kl. 02:00 - seinni hópur, hlauparar með yfir 600 ITRA stig.
  

Götulokanir og umferðarstýring vegna hlaupara í Súlur Vertical.

• Brekkugata og Klettastígur verða lokuð laugardaginn 1. ágúst á tímabilinu kl. 11-18.
• Umferðarstýring verður vegna þátttakenda í hlaupinu á nokkrum stöðum.
  • Við hringtorgið á mótum Hlíðarfjallsvegar og Hlíðarbrautar
  • Við gatnamót Dalsbrautar og Borgarbrautar
  • Í hluta Klettaborgar, frá göngustíg að Byggðavegi
  • Á gatnamótum Klettaborgar og Byggðavegar
  • Á Þórunnarstræti, gangbraut ofan við lögreglustöðina
  • Á gatnamótum Brekkugötu og Oddeyrargötu

LAUGARDAGUR OG SUNNUDAGUR - 1.-2 ÁGÚST - akstursíþróttir

Bílaklúbbur Akureyrar stendur fyrir tveimur keppnum um verslunarmannahelgina.

• Laugardagur 1. ágúst frá kl. 12
  Íslandsmót í áttungsmílu
• Sunndagur 2. ágúst frá kl. 12
  Bikarmót í spyrnu