Vasco da Gama síðasta skemmtiferðaskip ársins

Síðasta skemmtiferðaskip ársins lagðist að bryggju á Akureyri í gærmorgun, 26. október – nokkru seinna en undanfarin ár. Fyrsta skipið í ár, Amera, lagðist að Tangabryggju 7. maí, alls höfðu um 175 skip viðkomu að þessu sinni og farþegarnir voru um 250 þúsund.

Aðeins komu tvö skemmtiferðaskip til Akureyrar í þessum mánuði, hið fyrra var Rembrandt Van Rijn sem var hér 12. október og síðasti „gesturinn“ var Vasco da Gama, sem getur flutt allt að 1200 farþega. Skipið lagðist að bryggju árla morguns í gær og Þorgeir Baldursson tók þessa fallegu mynd þegar hinn glæsilegi nafni portúgalska landkönnuðarins hélt á brott á ný um sexleytið í gærkvöldi.