KA/Þór fær efnilegan línumann úr Eyjum

KA/Þór tilkynnti fyrir stundu um nýjan leikmann og sækir liðsstyrk til Vestmannaeyja og hefur samið við Herdísi Eiríksdóttur, 19 ára öflugan línumann, sem kemur til með að styrkja liðið í baráttunni í efstu deild, Olísdeildinni, á komandi tímabili. 

Í frétt félagsins segir að Herdís sé afar efnileg og hefur hún verið fastamaður í yngri landsliðum Íslands undanfarin ár. Hún spilaði 20 leiki með ÍBV í Olísdeildinni í vetur. 

„Við erum afar spennt fyrir komu Herdísar hingað norður en undanfarin ár hefur KA/Þór verið að byggja upp öflugt lið á yngri leikmönnum og verður gaman að sjá hvernig liðinu reiðir af í deild þeirra bestu eftir sannfærandi sigur í Grill66 deildinni í vetur. Það er ljóst að koma Herdísar mun aðeins styrkja liðið og bjóðum við hana hjartanlega velkomna norður,“ segir einnig í frétt félagsins.