Axel annar þjálfara 20 ára landsliðs Noregs

Akureyringurinn Axel Stefánsson, fyrrverandi þjálfari kvennalandsliðs Íslands í handbolta, hefur verið ráðinn þjálfari 20 ára landsliðs Noregs í kvennaflokki til tveggja ára ásamt Ane Mällberg. Framundan er undirbúningur og síðan þátttaka á heimsmeistaramóti 20 ára landsliða á næsta sumri. 

Handbolti.is greinir frá þessu í dag og vitnar í vef norska handknattleikssambandsins.

Axel hefur lengi búið í Noregi og þjálfað bæði karla- og kvennalið. Hann var til að mynda í þjálfarateymi kvennaliðs Storhamar sem varð Noregsmeistari, norskur bikarmeistari og Evrópudeildarmeistari 2024. Eftir það lét hann gott heita til að einbeita sér að starfi sínu sem kennari við háskólann í Elverum.

Axel, sem lék í marki á sínum tíma, hóf ferilinn með Þór en lék einnig með KA og Val hér heima. Hann hóf ungur að þjálfa og stýrði m.a. meistaraflokki karla hjá Þór um tíma. 

Smellið hér til að sjá frétt handbolta.is.