Vilt þú taka þátt í A! Gjörningahátíð?

Lumar þú á hugmynd að gjörningi eða ert áhugasöm/samur um að taka þátt í A! Gjörningahátíð?

Skipuleggjendur hátíðarinnar kalla nú eftir gjörningum eða hugmyndum frá listafólki úr öllum listgreinum og öðrum áhugasömum um hátíðina, sem fram fer 9.-12. október næstkomandi. Valið verður úr innsendum hugmyndum og fá þátttakendur greiddar 80.000 krónur í þóknun. Áhugasöm eru beðin um að senda umsókn á umsokn@listak.is ásamt textalýsingu á hugmynd og sýnishorni í myndformi af fyrri verkum. Umsóknarfrestur er til og með 22. ágúst næstkomandi.

Sköpunarkraftur yngri kynslóðarinnar virkjaður í ár

A! er fjögurra daga alþjóðleg gjörningahátíð sem nú er haldin í ellefta sinn. Í frétt á vef Listasafnsins á Akureyri segir að í ár verði sú nýjung að boðið verður upp á gjörningasmiðjur fyrir yngri kynslóðina og afraksturinn sýndur á síðasta degi hátíðarinnar.

Gjörningahátíðin er samvinnuverkefni Listasafnsins á Akureyri, Leikfélags Akureyrar, Menningarhússins Hofs, Gilfélagsins, Myndlistarfélagsins, Vídeólistahátíðarinnar Heim og Listnámsbrautar Verkmenntaskólans á Akureyri. Þátttakendur eru listamenn á öllum aldri, ásamt reyndum og vel þekktum gjörningalistamönnum, dans- og leikhúsfólki. Að venju verður frítt inn á alla viðburði hátíðarinnar.