Toppslagur þegar Þór tekur á móti KR

Kvennalið Þórs í körfubolta tekur á móti KR í kvöld í síðasta heimaleiknum í deildarkeppninni. Bæði lið eru í toppbaráttu næst efstu deildar Íslandsmótsins, Þórsstelpurnar í öðru sæti með 34 stig en KR-ingar í fjórða sæti með 26. 

Stjarnan er orðin deildarmeistari en eftir að hefðbundinni deildarkeppni lýkur tekur við úrslitakeppni fjögurra efstu liða um hvert þeirra hreppir eitt laust sæti í efstu deild næsta keppnistímabil.

Leikurinn í kvöld hefst í Íþróttahöllinni klukkan 19.15.

Þór og KR hafa mæst tvisvar í vetur og Þórsarar haft betur í bæði skiptin í mjög spennandi leikjum; unnu 71:69 á Akureyri og 83:79 í Reykjavík.

Á heimasíðu Þórs er þeim, sem ekki komast á leikinn, bent á að hann verður í beinu streymi á Þór TV https://www.livey.events/thortv