Fyrst tunglfiskur, svo fannst túnfiskur

Tunglfiskur fannst á dögunum við Leiruveg á Akureyri eins og akureyri.net greindi frá og viku síðar, síðastliðinn föstudag, fannst bláuggatúnfiskur rekinn á land skammt frá.

Þótt þetta hljómi svipað, tunglfiskur og túnfiskur, eru tegundirnar ekkert skildar og það þykir með hreinum ólíkindum að báðar skuli finnast á þessu svæði enda báðar vanar að halda sig sunnar og í hlýrri sjó. Skammt er því stórra högga á milli.

Vísindamenn í sjávarútvegsfræði við Háskólann á Akureyri (HA) sem akureyri.net ræddi við segja merkilegt að finna tunglfisk í Eyjafirði og einnig sé merkilegt að finna þar túnfisk. En að finna báðar tegundir með svo stuttu millibili sé mjög merkilegt – jafnvel stórmerkilegt!

Ekki vitað um bláuggatúnfiska áður

Hreiðar Þór Valtýsson, fiskifræðingur og dósent við auðlindadeild HA, segir að þegar tilkynning barst um túnfiskinn hafi þeim hreinlega flogið í hug að um gabb hlyti að vera að ræða, slík væri tilviljunin, en túnfiskurinn reyndist raunverulegur eins og sá fyrri.

„Ekki hafa fundist heimildir fyrir því að bláuggatúnfiskar hafi fundist í Eyjafirði áður, en þeir veiðast alltaf annað slagið í hlýrri sjó fyrir sunnan land og hafa í einstaka tilfelli fundist norðar,“ segir Hreiðar, „til dæmis varð vart við túnfiska í Ísafjarðadjúpi og á Vopnafirði árið 1944.“

Bláuggatúnfiskur er merkilegur fiskur að mörgu leyti, að sögn Hreiðars. „Líkt og tunglfiskurinn, sem fannst viku áður, er hann úthafsfiskur í tiltölulega hlýjum sjó. Tunglfiskur getur líka orðið gríðarlega stór, en þar enda líkindin. Tunglfiskur er hægsyntur og talinn óætur á meðan bláugga túnfiskur er einn öflugasti sundfiskur heims og einnig einn af verðmætustu fiskum heims.“

Hreiðar nefnir að núna sé „hlýtt tímabil“ og hafi verið síðustu áratugi; þá verði einna helst vart við svona sjaldgæfa gesti sem séu annars sunnar. Hann segir sjávarhita núna um 10 gráður.

„Mögnuð tilviljun“

Frétt akureyri.net 7. september:

• Fyrsti tunglfiskur við Norðurland í 126 ár?