Pistlar

Frumbyggjar Vopnafjarðar

Jóhann Árelíuz skrifar 05. október 2025 | kl. 11:30

EYRARPÚKINN - 59

Þeir voru fleiri en Ingólfur og Hjörleifur sem undu ekki ofríki Noregskonungs og skartaði Hofsárdalurinn grænu þegar fyrsti landnámsmaður sveitarinnar lagði að við Skipakletta.

Eyvindur vopni sigldi frá Strind í Þrándheimi og samdi ekki við Harald hárfagra frekar en Lýtingi Arnbjarnarsyni sem á hæla hans kom og nam alla eystri strönd Vopanfjarðar og bjó í Krossavík. Þriðji landnámsmaðurinn Hróaldur Bjóla eignaði sér Vopnafjörð norðan Vesturdalsár, Selárdal og Strönd og bjó á Torfastöðum.

Steinbjörn Refsson bróðursonur Eyvinds vopna kemur næst við sögu og gaf Eyvindur honum allt land milli Hofsár og Vesturdalsár og er Steinbjörn frumbyggi á Hofi.

Á Eyrinni handan heiða vorum við strákarnir Gunnar á Hlíðarenda, Grettir og Egill Skallagrímsson og hjuggum mann og annan.

Simmi átti bókina Þá riðu hetjur um héruð og voru kapparnir á bókarkápu síðhærðir og fagurlima, skikkjum sveiptir með spjót á lofti.

Þannig sá ég landnámsmenn Vopnafjarðar fyrir mér sem þeir hleyptu fráneygir upp og niður dali hinnar víðivöxnu sveitar og stilltu til friðar og úlfúðar.

Jóhann Árelíuz er rithöfundur og skáld.

Á sunnudögum síðustu misseri hefur akureyri.net birt kafla úr Eyrarpúkanum, gáskafullu skáldverki Jóhanns Árelíuzar sem gerist á Eyrinni á Akureyri um miðja síðustu öld. Bókin kom út 2003. Frumbyggjar Vopnafjarðar er kafli úr bókinni Sveskjur í sólarlaginu, síðari bók Jóhanns um Eyrarpúkann en þar segir einkum frá dvöl drengsins á æskuslóðum föður hans í Vopnafirði. Bókin kom út 2010.

Til baka í yfirlit pistla