Akureyri stendur ekki í vegi fyrir kjarasamningum

Akureyrarbær stendur ekki í vegi fyrir undirskrift á kjarasamningum.

Ég tek undir að sveitarfélögin gera sér grein fyrir því að allir aðilar þurfi að koma að borðinu í kjaraviðræðum til að ná grunnmarkmiðunum, sem er að bæta kaupmátt í landinu. Aðgerðir sem ná niður verðbólgu og gefa grundvöll til vaxtalækkunar eru lykilatriði í því efnum.

Mér finnst mér afar dapurt að einstaka fréttamenn hafi verið duglegir við að búa til fréttir um að einstök sveitarfélög séu að hamla því að það sé skrifað undir kjarasamninga. Væri ekki fyrsta skrefið að hafa samband við viðkomandi meirihluta sveitarfélagana áður en svona fréttir eru skrifaðar?

Einnig finnst mér að það hefði verið mun farsælari leið að sveitarfélög höfðu fengið tækifæri til að ígrunda kosti og galla við þessa aðferð og hvort aðrar leiðir væru færar.

Samkvæmt bókun bæjarstjórnar Akureyrarbæjar frá 5. desember 2023 þá munum við leggja okkar að mörkum til þess að klára kjarasamningana sama hver ákvörðunin verður:

Í ljósi efnahagsþróunar telur bæjarstjórn Akureyrarbæjar að mikilvægt sé að horft verði til samstillts átaks til að kveða niður verðbólguna. Komi til þess er Akureyrarbær tilbúinn að koma að slíku átaki.

Heimir Örn Árnason er formaður bæjarráðs og formaður fræðslu- og lýðheilsuráðs Akureyrarbæjar