Fara í efni
Menning

Mögnuð myndskeið: Síld og hvalir við Grímsey

Skapti Hallgrímsson - skapti@akureyri.net 16.07.2025 kl. 21:30

Mokveiði hefur verið við Grímsey undanfarið, eins og fram kom á vef Akureyrarbæjar í dag og Akureyri.net greindi frá fyrr í kvöld. Á vef bæjarins kom einnig fram að síld hafi verið í vöðum nærri Grímsey og stórhveli elt hana nánast upp í landsteina.

Akureyri.net birtir hér, með góðfúslegu leyfi, stórbrotin myndbönd Einars Guðmann og Gyðu Henningsdóttur sem þau tók við Grímsey.

„Það var mikið sjónarspil að fylgjast með síld og hvölum dansa allt í kringum Grímsey í gær,“ skrifaði Einar þegar hann birti fyrr myndbandið fyrir nokkrum dögum. „Hnúfubakar, hnísur, hrefnur, og höfrungar virtust agnarsmáir í samanburði við síldarbreiðurnar sem náðu enda á milli í Grímsey. Sérstaklega þótti mér sjónarhorn drónans sýna vel hraðann á síldinni sem forðaði sér undan hnúfubökunum.“
 
Einar bætti við: „Sjómenn segja mér að dýptarmælar sýni að síldin sé ekki bara í yfirborðinu, heldur nái víða frá botni upp á yfirborðið. Magnið hlýtur að spanna þúsundir tonna. Það er svo sannarlega líflegt við Grímsey þessa dagana.“

 

SMELLIÐ Á MYNDINA TIL AÐ HORFA Á MYNDBANDIÐ

Í gær birti Einar svo annað myndband, ekki síður áhugavert.

„Það er bara ein leið til að komast að því hvað hvalirnir og höfrungarnir eru að éta. Ég skrapp á kayak með myndavél og dýfði henni undir yfirborðið. Á meðan flaug Gyða drónanum til að skoða þetta úr lofti,“ skrifaði hann þá.

SMELLIÐ Á MYNDINA TIL AÐ SJÁ SEINNA MYNDBANDIÐ

Til baka í yfirlit