Mannlíf
Falleg kvöldstund í Miðgarðakirkju
22.06.2025 kl. 04:00
Bræðurnir Bjarni og Svafar Gylfasynir tóku lagið upp við altarið í gærkvöld ásamt séra Pálma Matthíassyni. Myndir: Helgi Jónsson
Til stóð að vígja Miðgarðakirkju í Grímsey í dag, sunnudag, von var á biskupi Íslands af því tilefni en upp úr hádegi á föstudag var athöfninni frestað vegna slæmrar veðurspár. Eyjarskeggjar tóku hins vegar forskot á sæluna í gærkvöld, laugardagskvöld, og héldu samkomu í kirkjunni.
Margir höfðu gert sér ferð út í eyju vegna fyrirhugaðrar vígsluathafnar og ákveðið var að opna kirkjuna gestum og gangandi í gærkvöld. Það var að sögn afar falleg stund og tár víða á hvarmi – gleðitár. Að sögn viðmælanda Akureyri.net voru nokkrir erlendir ferðamenn á meðal samkomugesta og skemmtu sér augljóslega vel þótt þeir hafi ekki skilið orð af hinu talaða máli.
Séra Pálmi Matthíasson, fyrrverandi sóknarprestur Grímseyinga (þegar hann þjónaði í Glerárprestakalli á Akureyri) flutti ávarp, Alfreð Garðarsson formaður sóknarnefndar lék á harmoniku, einnig var leikið á gítar og sungið.
Kirkjan verður vígð við hátíðlega athöfn sunnudaginn 10. ágúst í sumar.
Sigrún Þorláksdóttir kveikir á kertum við altarið áður en athöfnin hófst í Miðgarðakirkju. Séra Pálmi Matthíasson við hlið hennar.
Alfreð Garðarsson formaður sóknarnefndar Miðgarðakirkju og séra Pálmi Matthíasson, fyrrverandi sóknarprestur Grímseyinga, í kirkjunni í gærkvöld.
Miðgarðakirkja í Grímsey sem risin er á grunni þeirrar gömlu sem brann til kaldra kola í september 2021.
