Körfubolti: Þór tapaði fyrir toppliði Sindra
Þórsarar sóttu ekki gull í greipar Hornfirðinga þegar þeir sóttu topplið Sindra heim í 12. umferð 1. deildar karla í körfuknattleik í kvöld. Lokatölur urðu 96-77 Sindra í vil. Þórsarar eru áfram í 10. sæti deildarinnar, hafa unnið þrjá leiki af fyrstu 12.
Heimamenn í Sindra sigldu fljótlega fram úr Þórsurum, náðu 15 stiga forskoti í fyrsta leikhluta, 27 stiga forskoti eftir fyrri hálfleikinn og héldu þeim dampi lengst af, sigldu sigrinum örugglega í höfn. Forysta Sindra varð mest 30 stig þegar leið á þriðja fjórðunginn, en aðeins dró saman með liðunum í lokafjórðungnum, munurinn að lokum 19 stig þegar upp var staðið og sigur Sindra aldrei í hættu.
Sindri - Þór (30-15) (27-19) 57-34 (14-14) (25-29) 96-77
Christian Caldwell var eins og oftast áður atkvæðamestur í Þórsliðinu, skoraði 24 stig. Pétur Cariglia tók tíu fráköst og átti sex stoðsendingar.
Helstu tölur leikmanna Þórsliðsins, stig/fráköst/stoðsendingar:
- Christian Caldwell 24/8/1
- Týr Óskar Pratiksson 20/2/2
- Páll Nóel Hjálmarsson 11/3/0
- Pétur Cariglia 7/10/6
- Paco Del Aquilla 7/9/2
- Helgi Hjörleifsson 4/2/1
- Smári Jónsson 2/2/2
- Finnbogi Páll Benónýsson 2/0/1
