Viðburðarík íþróttavika eins og flestar aðrar

Íþróttavikan verður viðburðarík eins og flestar aðrar vikur ársins hjá Akureyrarliðunum. Íshokkíliðin eiga bæði úti- og heimaleiki, tveir heimaleikir í handbolta og einn útileikur, tveir heimaleikir í körfubolta og útileikur í blaki. Eitthvað við að vera hjá íþróttaáhugafólki nánast alla daga vikunnar.

Góða skemmtun!

ÞRIÐJUDAGUR 11. NÓVEMBER - íshokkí

Aftur og nýbúnir! SA Víkingar sækja Fjölni heim í Egilshöllina  í dag, en þessi lið mættust í Skautahöllinni á Akureyri á laugardaginn. Þar hafði SA 4-3 sigur í leik þar sem Fjölnir náði þrisvar forystunni. SA er í efsta sæti Toppdeildar karla með níu stig eftir sigur í fyrstu þremur leikjum sínum, en Fjölnir er án stiga í botnsætinu.

• Toppdeild karla í íshokkí
  Egilshöllin kl. 19:45
  Fjölnir - SA

MIÐVIKUDAGUR 12. NÓVEMBER - handbolti

KA vann öruggan sigur á Stjörnunni í 9. umferð Olísdeildarinnar og situr í 3. sæti deildarinnar með 12 stig, eins og Valur, en tveimur stigum á eftir Aftureldingu og Haukum. FH er í 6. sæti deildarinnar með níu stig.

• Olísdeild karla í handknattleik
  Kaplakriki í Hafnarfirði kl. 19
  FH - KA

KA hefur unnið sex af fyrstu níu leikjum sínum. Þetta er mun betri byrjun en í fyrra og má til samanburðar geta þess að liðið vann átta leiki í deildinni allt síðasta tímabil og komið fram í byrjun mars þegar sjötti sigurleikurinn kom.

FIMMTUDAGUR 13. NÓVEMBER - körfubolti

Þórsurum hefur aðeins tekist að landa einum sigri það sem af er tímabili í 1. deild karla í körfuknattleik og situr í 10. sæti deildarinnar. Hamar og KV eru hvort sínu megin við Þór í töflunni, með einn sigur eins og Þór. Þórsarar fá Héraðsbúa í heimsókn í Höllina á fimmtudag, en lið Hattar féll úr Bónusdeildinni síðastliðið vor. Höttur er í 4. sæti deildarinnar, hefur unnið fjóra af fyrstu fimm leikjum sínum.

• 1. deild karla í körfuknattleik
  Íþróttahöllin á Akureyri kl. 19:15
  Þór - Höttur

FÖSTUDAGUR 14. NÓVEMBER - handbolti, blak

Akureyringar fá topplið Olísdeildar karla í handknattleik í heimsókn norður á föstudag. Þórsarar taka þá á móti liði Aftureldingar í 10. umferð deildarinnar. Afturelding er með 14 stig á toppnum, eins og Haukar, en Þórsarar eru í 10. sætinu með sex stig, hafa unnið tvo leiki og gert tvö jafntefli. 

• Olísdeild karla í handknattleik
  Íþróttahöllin á Akureyri kl. 19
  Þór - Afturelding

- - -

Kvennalið KA í blaki á í harðri toppbaráttu við HK, bæði hafa unnið alla sína leiki, en KA er með 20 stig, einu minna en HK. KA og HK eru langefst í deildinni.

KA fær Aftureldingu í heimsókn á föstudag, en þessi lið hafa barist um Íslandsmeistaratitilinn undanfarin ár. Afturelding er í 4. sæti deildarinnar með átta stig úr sjö leikjum.

• Unbroken-deild kvenna í blaki
  Íþróttamiðstöðin að Varmá kl. 19
  Afturelding - KA

LAUGARDAGUR 15. NÓVEMBER - handbolti, körfubolti, íshokkí

Lið KA/Þórs fékk skell í síðustu umferð á móti ÍBV í Eyjum og situr í 4. sæti deildarinnar með níu stig eftir átta umferðir. KA/Þór tekur á móti Selfyssingum í 9. umferðinni á laugardag, en Selfyssingar eru í 7. sæti deildarinnar með tvö stig. 

• Olísdeild kvenna í handknattleik
  KA-heimilið kl. 15
  KA/Þór - Selfoss

- - -

Kvennalið Þórs í körfuknattleik hefur unnið alla leiki sína í 1. deildinni til þessa og er í toppsætinu. Aþena og Selfoss hafa reyndar einnig unnið fjóra leiki eins og Þór, en Aþena hefur leikið einum leik meira. Tvö félög í Bónusdeildinni eru með B-lið sín í 1. deildinni og á laugardag tekur Þórsliðið á móti B-liði Stjörnunnar sem er í 7. sæti deildarinnar með einn sigur í þremur leikjum.

• 1. deild kvenna í körfuknattleik
  Íþróttahöllin á Akureyri kl. 16
  Þór - Stjarnan b

- - -

Það má búast við hörkuslag í Toppdeild karla í íshokkí á laugardag þegar lið Skautafélags Reykjavíkur kemur norður, en leikurinn verður þriðji leikur SA Víkinga á einni viku. SA vann leik þessara liða á ofurhelginni í Egilshöllinni fyrir stuttu, en SR-ingar hafa síðan þá fengið liðsstyrk með tveimur leikmönnum úr SFH, þeim Pétri Maack og Birni Róbert Sigurðarsyni.

• Toppdeild karla í íshokkí
  Skautahöllin á Akureyri kl. 16:45
  SA - SR

- - -

Seinni íshokkíleikur dagsins er jafn áhugaverður og sá fyrri því kvennalið SA tekur á móti liði Skautafélags Reykjavíkur. SR-ingar hafa styrkst mjög frá síðasta tímabili og eru í 2. sæti deildarinnar með tíu stig. SA hefur unnið alla sína leiki, þar af einn í framlengingu gegn SR. Það verður því örugglega hart barist og von á góðri skemmtun þegar þessi lið mætast á laugardag. 

• Toppdeild kvenna í íshokkí
  Skautahöllin á Akureyri kl. 19:30
  SA - SR

- - -