Færðu Gesti og Erlu sex milljónir króna

Fulltrúar Þórs og Macron færðu í gær hjónunum Gesti Arasyni og Erlu Bryndísi Jóhannsdóttur sex milljónir króna í styrk. Féð safnaðist með sölu á sérstakri treyju, Gedda treyju, sem hönnuð var og seld til styrktar fjölskyldunni eftir að Gestur greindist með bráðahvítblæði í vor. Hann fór strax í meðferð á Landspítalanum og þau hjón eru þar enn.

Gestur hefur verið liðsstjóri knattspyrnuliðs Þórs síðustu ár og ötull sjálfboðaliði í félaginu að ýmsu öðru leyti.

Síðustu vikur hafa sjálfboðaliðar unnið að því hörðum höndum að merkja treyjurnar hjá Macron í Reykjavík. Þórsarar seldu hvorki fleiri né færri en um 900 treyjur, merktar FYRIR GEDDA, og verða þær afhentar í Hamri, félagsheimili Þórs, frá og með deginum í dag.

Á myndinni, sem tekin var á Landspítalanum, eru frá vinstri: Eva Dögg Sæmundsdóttir verslunarstjóri Macron, Gestur Arason, Erla Bryndís Jóhannsdóttir og Þórsarinn Jason Orri Geirsson, sem hannaði treyjuna.