Andrés önd mættur enn eitt árið – MYNDIR

Andrésar andar leikarnir í skíðaíþróttum voru settir með pompi og prakt í gærkvöldi, eins og hefð er fyrir á síðasta degi vetrar. Þetta eru stórafmælisleikar eins og áður hefur komið fram – 50 ár eru síðan fyrstu leikarnir voru haldnir í Hlíðarfjalli, vorið 1976. Og það eru 50. leikarnir sem fara fram í þetta skipti því einu sinni varð að aflýsa þeim vegna snjóleysis.

Venju samkvæmt var skrúðganga frá Lundarskóla að Íþróttahöllinni þar sem leikarnir voru settir og var gangan sú arna líklega fjölmennari en nokkru sinni því þátttakendur á leikunum hafa aldrei verið fleiri; alls eru 1084 börn skráð sem keppendur að þessu sinni – í alpagreinum, snjóbrettum, skíðagöngu og skíðaskotfimi. Þetta er töluverð aukning frá því í fyrra þegar skráðir þátttakendur voru 930. Fararstjórar og  þjálfarar eru vitaskuld alltaf með í för og margir foreldrar fylgja einnig börnum sínum.

Keppni hefst jafnan að morgni sumardagsins fyrsta og svo er einnig nú. Keppni hófst klukkan 9 á brettum og í stórsvigi, skömmu síðar hófst keppni í svigi og göngu og fjörið heldur áfram fram eftir degi. Verðlaunaafhending verður í Íþróttahöllinni kl. 19, á sama tíma annað kvöld og laugardag, þegar leikunum lýkur, hefst afhending verðlauna kl. 15 og síðan verður mótinu slitið.

• Á setningarathöfninni var Akureyringurinn Tómas Leifsson heiðraður af Skíðasambandi Íslands (SKÍ). Tommi fékk heiðursstjörnu SKÍ, æðstu viðurkenningu sambandsins.
• Þá voru Ívar Sigmundsson, Gísli Kristinn Lórenzson og Hermann Sigtryggsson heiðraðir; þremenningarnir voru í fyrstu Andrésar andar nefndinni ásamt Leifi Tómassyni og Kristni Steinssyni, sem báðir eru látnir. Ívar og Gísli Kristinn voru í nefndinni allar götur frá 1976 til ársins 2005 – í þrjá áratugi! 
• Akureyringurinn Sonja Lí Kristinsdóttir, sem keppti í svigi og stórsvigi á Vetrarólympíuleikunum á Ítalíu fyrr á árinu, ávarpaði keppendur á leikunum og hvatti þá til dáða.
• Karl Frímannsson, skólameistari Menntaskólans á Akureyri og fyrrverandi skíðamaður, setti leikana með ávarpi.
• Ólöf Milla Valsdóttir, 16 ára stúlka úr Skíðafélagi Akureyrar, tendraði mótseldinn. Ólöf Milla er dóttir Akureyringsins Dagnýjar Lindu Kristjánsdóttur, fyrrverandi skíðadrottningar, Ólympíufara og margfalds Íslandsmeistara.

Þorgeir Baldursson var á ferðinni með myndavélina í gær og neðar má sjá nokkrar myndir af Facebook síðu Andrésar andar leikanna.