Íþróttir

Allt hægt ef við fáum geggjaðan stuðning

Skapti Hallgrímsson - skapti@akureyri.net 25.02.2026 kl. 16:00

Leikmenn KA/Þórs og þjálfarar rétt fyrir brottför frá KA-heimilinu í morgun. Þar var boðið upp á morgunverðarveislu sem markvörðurinn Matea Lonac og fleiri útbjuggu og síðan haldið suður á bóginn. Myndir: Skapti Hallgrímsson

Stelpurnar í KA/Þór ráðast ekki á garðinn þar sem hann er lægstur í kvöld þegar þær mæta Val í undanúrslitum bikarkeppninnar í handbolta í Haukahúsinu í Hafnarfirði. Raunar má segja að þær ráðist á garðinn þar sem hann er hæstur því Valur er líklega besta lið landsins um þessar mundir, er altjent á toppi Olísdeildarinnar og firnasterkt, en það fallega við íþróttirnar er að þar getur allt gerst.

Viðureign KA/Þórs og Vals hefst kl. 20:15. Sigurliðið mætir Fram eða Haukum í úrslitaleik á laugardag.

Trúin flytur fjöll, segir einhver staðar og Stelpurnar okkar í KA/Þór hafa vonandi trú á verkefninu. Ástæða er til að hvetja alla norðanmenn á borgarhorninu – a.m.k. alla þá sem vettlingi geta valdið í því leiðindaveðri sem ku hrella sunnanmenn í augnablikinu – til að gera sér ferð í Hafnarfjörð og styðja við bakið á stelpunum.

„Við þurfum að leika mjög agað og reyna að koma í veg fyrir að Valsliðið fái tækifæri til að gera auðveld mörk,“ sagði Jónatan Magnússon þjálfari KA/Þórs við akureyri.net. Það er auðvitað hverju orði sannara; Valsliðið er fljótt að refsa með hraðaupphlaupi ef mótherjinn missir boltann í sókn.

Feðginin Guðmundur Friðriksson og dætur hans, leikmennirnir Bergrós Ásta og Hafrún Linda, við morgunverðarhlaðborðið í KA-heimilinu í morgun. Þau komu að því að útbúa kræsingarnar en morgunverðardrottningin Matea Lonac var of hlédræg til að mæta fyrir framan myndavélina ...

Skörð eru hoggin í leikmannahóp KA/Þórs. Til dæmis er markvörðurinn Matea Lonac fjarri góðu gamni eins og í síðustu leikjum og Unnur Ómarsdóttir hefur ekki leikið síðan í byrjun mánaðarins.

„Við getum spilað hörkuvörn og ef það tekst er allt hægt. Fyrst og fremst þurfum við að hafa gaman, að skilja allt eftir á dúknum og trúa á okkar hugmyndafræði,“ sagði þjálfarinn. Og hann biðlar vitaskuld til fólks að mæta á leikinn, enda getur stuðningur skipt sköpum. „Við þurfum geggjaðan stuðning því þá er allt hægt – það vitum við. Við söknum þeirra leikmanna sem ekki geta spilað, en mætum hinsvegar með 16 fríska og öfluga leikmenn til leiks.“

Powerade-bikar kvenna í handbolta, undanúrslit
Ásvellir í Hafnarfirði kl. 18:00
Fram - Haukar
Útsending: Beint á RÚV 2