Verður BSO húsið flutt í Kjarnaskóg?

Sú hugmynd hefur verið rædd í herbúðum Skógræktarfélags Eyfirðinga að falast eftir BSO-húsinu og láta flytja það í Kjarnaskóg. Málið verður rætt á fundi Skógræktarfélagsins á morgun, miðvikudag, og þá ákveðið hvort félagið óski eftir því að eignast húsið eður ei. Frestur til þess rennur út kl. 11:00 næsta fimmtudag, 21. maí.

Bifreiðastöð Oddeyrar – leigubílastöðin BSO – hafði í 70 ár aðsetur í húsinu, sem er án efa það umtalaðasta í bænum undanfarið. Bílstjórarnir skelltu þar í lás í hinsta sinn um mánaðamótin og Akureyrarbær tilkynnti á dögunum að húsið fengist gefins með því skilyrði að það verði farið af lóðinni í miðbænum í síðasta lagi 15. júní á kostnað þess sem þiggur það að gjöf, ella verði það rifið.

Samkvæmt því sem akureyri.net kemst næst hafa nokkrar hugmyndir um nýtingu hússins í Kjarnaskógi skotið upp kollinum. Það gæti til dæmis hentað sem vinnuaðstaða fyrir starfsmenn félagsins eða hugsanlega sem afdrep fyrir sjálfboðaliða. Einnig hefur verið nefnt að húsið mætti jafnvel nota í þágu gesta og notenda skógarins, til dæmis ef hið áhugaverða verkefni „Karlar í skúrum“ yrði að veruleika.

Einhver kann að spyrja hvað „Karlar í skúrum“ er og því rétt að benda á grein Karenar Sigurbjörnsdóttur sem birtist á akureyri.net í síðustu viku: Karlar í skúrum.