Samherji innleiðir róbóta í vélaþrif á Dalvík
Róbóti sem þrífur vélbúnað í vinnslu Samherja á Dalvík hefur verið tekinn í notkun, eftir um tveggja ára þróunarferli í samvinnu við kanadíska fyrirtækið Rbot9. Þessi lausn hefur vakið mikla athygli matvælafyrirtækja víða um heim, sem hafa óskað eftir því að fá að skoða búnaðinn á Dalvík.
Í frétt á vefsíðu Samherja kemur fram að Rbot9 sé verkfræðifyrirtæki sem sérhæfi sig í þróun og samþættingu á kapaltengdum róbótum. Fyrirtækið hlaut nýsköpunarverðlaun á tæknisýningunni EATS Expo 2025, sem er sú stærsta sinnar tegundar í Norður-Ameríku. Starfsmenn Samherja komust í kynni við kanadíska fyrirtækið á tækni- og matvælasýningu í Bandaríkjunum og hrifust af róbótum þess. Á sýningunni voru kynntir róbótar sem svífa um í kaplakerfi og greina skemmdir á flugvélaskrokkum.
Einn róbóti tekinn í notkun og unnið að þróun fleiri tæknilausna
Atli Dagsson, tæknistjóri landvinnslu Samherja segir í fréttinni að við hönnun nýja vinnsluhússins á Dalvík hafi verið sérstaklega horft til þess að hafa góða lofthæð og nægt rými á milli vinnslulína, enda líklegt að í framtíðinni myndi verða framleiddur búnaður sem þyrfti umtalsvert rými. Og lofthæðin og plássið er einmitt það sem áðurnefndir róbótar þurfa. „Eftir skammar viðræður hófust tækniteymi fyrirtækjanna handa við að þróa þetta róbótakerfi með það fyrir augum að nýta við þrif á vinnslulínum á Dalvík. Í dag er staðan sú að búið er að setja upp róbóta sem sér um að þrífa lausfrystiflokkara. Vinna við þróun fleiri slíkra tæknilausna er vel á veg komin og við bindum vonir við að fleiri sambærilegir róbótar verði settir upp hjá okkur á næstu árum,“ segir Atli í fréttinni á vef Samherja.
Í fréttinni bendir Gestur Geirsson, framkvæmdastjóri landvinnslu Samherja, á að hreinlæti sé stór og mikilvægur liður í allri matvælavinnslu og strangar kröfur séu gerðar um hreinlæti og meðferð hráefnis. Vinna við þrif sé hins vegar utan hefðbundins vinnutíma og henti því ekki öllum. „Róbótinn fer í gang fljótlega eftir að vinnslu lýkur. Með þessari tækni breytast störfin að hluta til í eftirlit með því að búnaðurinn vinni vel og örugglega,“ segir Gestur og bendir á að Samherji hafi lagt mikla áherslu á þróun og nýsköpun og innleiðingu nýrra lausna. „Samstarfið við Rbot9 er í takt við þá stefnu. Þessi samvinna hefur nú leitt af sér tæknilausn sem hlotið hefur alþjóðlega athygli,“ segir Gestur ennfremur og ef að líkum lætur á hann eftir að taka á móti fulltrúum áhugasamra matvælafyrirtækja víða úr heiminum á næstu misserum sem vilja skoða nýja þrifaróbótinn.
