Fara í efni
Fréttir

Samfylking stillir upp, Hilda vill efsta sætið aftur

Samfylking stillir upp, Hilda vill efsta sætið aftur

„Á almennum félagsfundi Samfylkingarinnar á Akureyri í gærkvöldi var samþykkt samhljóða að skipa uppstillingarnefnd sem fer með það hlutverk að stilla upp lista flokksins fyrir komandi sveitarstjórnarkosningar. Hilda Jana Gísladóttir tilkynnti á fundinum að hún vilji áfram leiða flokkinn á Akureyri,“ segir í tilkynningu frá stjórn Samfylkingarinnar á Akureyri í morgun.

Í uppstillingarnefnd voru kjörin þau Unnar Jónsson, Albertína Friðbjörg Elíasdóttir og Arnar Þór Jóhannesson. Uppstillingarnefnd mun leggja fram tillögu sína á almennum félagsfundi 24. febrúar.

„Fundurinn var vel sóttur og greina mátti spennu og eftirvæntingu fyrir kosningunum í vor. Í almennum umræðum sem fram fóru í kjölfar ákvörðunar um uppstillingu listans kom fram mikil ánægja með störf bæjarfulltrúa og annarra kjörinna fulltrúa Samfylkingarinnar við krefjandi aðstæður á kjörtímabilinu sem senn rennur sitt skeið á enda,“ segir í tilkynningunni.