Rekstur bæjarins jákvæður um milljarð

Rekstur samstæðu Akureyrkaupstaðar – Aðalsjóðs og fyrirtækja – gekk betur á síðasta ári en gert var ráð fyrir. Fjárhagsáætlun gerði ráð fyrir 846 milljóna króna afgangi en niðurstaðan var jákvæð um rúman milljarð króna. Þetta kemur fram í ársreikningi sveitarfélagsins sem lagður var fram í bæjarráði fyrir helgi og verður til fyrri umræða á fundi bæjarstjórnar í dag.

Starfsemi sveitarfélagsins er skipt upp í tvo hluta. 

• Til A hluta telst sveitarsjóður, sem er Aðalsjóður sveitarfélagsins, auk annarra sjóða og stofnana er sinna starfsemi sem að hluta eða öllu leyti eru fjármögnuð með skatttekjum. Auk Aðalsjóðs er um að ræða Fasteignir Akureyrarbæjar, Eignasjóður gatna og  Umhverfismiðstöð.
• Niðurstaða A-hluta var neikvæð um 422 milljónir en fjárhagsáætlun gerði ráð fyrir að „mínusinn“ yrði meiri, 842 milljónir. Árið áður var rekstur A-hluta jákvæður um 834 milljónir.
• Til B hluta teljast fjárhagslega sjálfstæð fyrirtæki sem að hálfu eða að meirihluta eru í eigu sveitarfélagsins en rekstur þeirra er að stofni til fjármagnaður með þjónustutekjum; Félagslegar íbúðir Strætisvagnar Akureyrar, Hlíðarfjall, Hafnasamlag Norðurlands og Norðurorka.

Rekstrarniðurstaða samstæðunnar fyrir fjármagnsliði og tekjuskatt var jákvæð um tæpa 2,4 milljarða en áætlun hafði gert ráð fyrir 3,2 miljarða króna rekstrarafgangi, skv. tilkynningunni. 

„Meginskýringar á lakari rekstrarniðurstöðu samstæðunnar fyrir fjármagnsliði og tekjuskatt eru mikil áhrif hækkandi lífeyrisskuldbindinga á árinu. Gjaldfærð lífeyrisskuldbinding nemur 2 milljörðun króna en áætlun gerði ráð fyrir 800 milljóna króna gjaldfærslu,“ segir þar.

Sátt við niðurstöðuna

„Við getum ekki annað en verið sátt við þessa niðurstöðu. Það eru helst lífeyrisskuldbindingar í kjölfar nýrra kjarasamninga opinberra starfsmanna sem skekkja myndina dálítið en þrátt fyrir það erum við réttum megin við núllið og gott betur en það. Bæjarbúum heldur áfram að fjölga hægt og bítandi, ný hverfi byggjast upp og það er hugur í fólki. Ég er því bjartsýn á framhaldið og vona að við getum gert enn betur á komandi árum,“ segir Ásthildur Sturludóttir bæjarstjóri í tilkynningu frá sveitarfélaginu.

Í tilkynningu frá bænum er að finna ýmiskonar tölfræði að vanda, meðal annars eftirfarandi:

• Heildarlaunagreiðslur með launatengdum gjöldum en án hækkunar lífeyrisskuldbindinga hjá samstæðunni voru tæpir  21,9 milljarðar.
• Stöðugildi voru að meðaltali 1.583 og fjölgaði um 53 stöðugildi frá árinu áður.
• Laun og launatengd gjöld ásamt lífeyrisskuldbindingum samstæðunnar í hlutfalli við rekstrartekjur hennar voru 58,2%.
• Annar rekstrarkostnaður var 29,5% af rekstrartekjum.
• Skatttekjur og framlög úr Jöfnunarsjóði sveitarfélaga voru rúmlega 1,3 milljónir kr. á hvern íbúa en tekjur voru samtals 2 milljónir króna á hvern íbúa.
• Árið 2024 voru skatttekjurnar 1.238.000 kr. á hvern íbúa og heildartekjurnar 1.891 þús. kr. á hvern íbúa.
• Veltufé frá rekstri nam 5,7 milljörðum króna, um 500 milljónum meira en áætlað var. 
• Handbært fé frá rekstri nam 5,2 milljörðum.
• Afborgun langtímalána nam 1,6 milljöðrum. Ný langtímalán voru tekin fyrir 600 milljónir kr.
• Lækkun á handbæru fé á árinu nam 363 milljónum og var handbært fé samstæðunnar í árslok 2,6 milljarðar.
• Veltufé frá rekstri árið 2025 í hlutfalli við tekjur nam 13,81% í samstæðunni og 7,76% í A-hluta. Árið áður voru hlutföllin 15,13% í samstæðunni og 9,54% í A-hluta.