Oddur Helgi vill fá Dvergaholt opnað
Oddur Helgi Halldórsson, íbúi við Dvergaholt og fyrrverandi bæjarfulltrúi, hefur óskað eftir því við bæjarráð Akureyrar að synjun skipulagsráðs á tillögu hans um breytingu á deiliskipulagi Dvergaholts verði tekin til endurskoðunar. Oddur Helgi lagði til að deiliskipulag Holtahverfis norður og Sandgerðisbótar yrði samræmt þannig að hægt yrði að aka Dvergaholt niður á Óseyri. Gildandi deiliskipulag gerir hins vegar ekki ráð fyrir gegnumakstri og að Dvergaholt skuli vera botnlangagata. Á fundi bæjarráðs nýverið var erindi Odds Helga tekið fyrir og samþykkti ráðið að fela Ingu Þöll Þórgnýsdóttur bæjarlögmanni að kanna heimild til endurupptöku málsins.
Skipulagsráð hafnaði breytingartillögu Odds Helga eftir grenndarkynningu í júní. Í bókun ráðsins kemur fram að 11 athugasemdir hafi borist vegna málsins auk umsagnar frá umhverfis- og mannvirkjasviði. Með vísan til athugasemdanna féll ráðið frá því að opna fyrir umferð að og frá athafna- og hafnarsvæðinu um Dvergaholt. Ráðið taldi þó rétt að útfæra göngustíg þannig að unnt yrði að aka um hann ef á þyrfti að halda, til dæmis ef Dvergaholt yrði lokað við Krossanesbraut.
Oddur Helgi segir hins vegar að ákvörðunin hafi að verulegu leyti byggst á upplýsingum sem séu rangar, villandi eða ógreinilegar. Hann vísar til 24. greinar stjórnsýslulaga um endurupptöku málsins og óskar eftir því að bæjarráð vísi málinu aftur til skipulagsráðs.
Telur meirihluta ekki andvígan
Í beiðni sinni fer Oddur Helgi yfir niðurstöður grenndarkynningarinnar og gerir athugasemdir við ýmis atriði sem komu fram í umsögnum. Tillagan var kynnt frá 6. maí til 3. júní og segir hann að 69 af þeim 77 aðilum sem fengu grenndarkynningu hafi ekki sent inn athugasemdir og teljist því ekki andvígir breytingunni. Þrjár athugasemdir frá íbúum Dvergaholts hafi verið jákvæðar í garð breytingartillögunnar, tvær andvígar og ein hlutlaus en með ábendingum um öryggi. Jákvæð umsögn hafi einnig borist frá umhverfis- og mannvirkjasviði.
Hann bendir jafnframt á að lögreglan hafi verið beðin um umsögn en ekki svarað og telur hann því að hún hafi ekki verið andvíg breytingunni. Í upphaflegri grenndarkynningu Akureyrarbæjar kom fram að umsagnar væri leitað hjá bæði lögreglu og umhverfis- og mannvirkjasviði.
Deilt um áhrif umferðar
Talsverður skoðanamunur kom fram í innsendum athugasemdum um áhrif þess að opna Dvergaholt niður að Óseyri. Andstæðingar breytingarinnar bentu meðal annars á að aukin umferð gæti haft neikvæð áhrif á öryggi, hljóðvist, loftgæði og umhverfi íbúa. ÖBÍ réttindasamtök lýstu einnig áhyggjum af áhrifum breytingarinnar á fatlaða íbúa og bentu á mikilvægi þess að halda svæðinu rólegu og öruggu.
Í athugasemd frá íbúum og eigendum fasteigna við Óseyri var því mótmælt að Dvergaholt yrði gert að tengigötu inn á atvinnusvæðið. Þar var meðal annars vísað til mögulegra áhrifa á rekstur, umferð, viðhald báta og öryggi íbúa.
Oddur Helgi hafnar ýmsum þessara raka í beiðni sinni um endurupptöku. Hann segir meðal annars að starfsemi í Sandgerðisbót sé mun minni en haldið sé fram í athugasemdunum og tilgreinir m.a. fjölda landana í höfninni. Samkvæmt tölum sem hann tekur saman hafi 67 landanir farið fram í Sandgerðisbót árið 2026, samtals 43.300 kíló, og telur hann að það geti ekki talist mikil umsvif.
Hann hafnar einnig fullyrðingum um mikla umferð tengda skólphreinsistöð og segir að umferð tank- og hreinsibíla sé frá engri ferð á dag upp í örfáar og að umferð sérhæfðra tækja heyri til undantekninga.
Segir nægt pláss fyrir götu
Eitt af þeim atriðum sem Oddur Helgi tekur sérstaklega fyrir er hvort nægilegt rými sé fyrir götu milli Óseyrar 19 og 21. Hann vísar til mælinga úr Kortasjá Akureyrarbæjar og segir bilið milli lóðanna vera um 12,8 metra en „götukassa“ Dvergaholts um 10,7 metra. Hann bendir jafnframt á að í eldra deiliskipulagi hafi verið gert ráð fyrir sambærilegri breidd götu alla leið niður að Óseyri.
Í athugasemdum þeirra sem eru andvígir breytingartillögunni var því hins vegar haldið fram að of lítið pláss væri fyrir götu á milli lóða 19 og 21. Þeir vísuðu einnig til þess að slóðinn sem um ræðir hefði aldrei verið gata. Oddur Helgi mótmælir því og segir að líklega hafi verið gata á þessum stað í áratugi.
Segir upphaflegt erindi ekki hafa verið afgreitt að fullu
Oddur Helgi gerir einnig athugasemd við að upphaflegt erindi hans hafi snúist um meira en það eitt að opna Dvergaholt fyrir gegnumakstri. Hann hafi óskað eftir samræmingu tveggja deiliskipulaga, Holtahverfis norður og Sandgerðisbótar, þannig að Dvergaholt næði niður að Óseyri. Að hans mati hafi þeim hluti erindisins ekki verið svarað.
Í upphaflegu erindi sínu færði Oddur Helgi meðal annars þau rök fyrir breytingunni að tvær aðkomuleiðir gætu aukið öryggi íbúa, auðveldað aðkomu lögreglu og sjúkraliðs og auðveldað umferð til og frá Sandgerðisbót. Hann vísaði einnig til starfsemi í Bótinni og þess að nokkrir íbúar Dvergaholts ættu verbúðir eða báta þar.
Vill málið aftur á borð skipulagsráðs
Í beiðni sinni til bæjarráðs segir Oddur Helgi að hann telji sig hafa sýnt fram á að ýmis atriði í innsendum athugasemdum séu villandi eða röng og að skipulagsráð geti því ekki byggt ákvörðun sína á þeim. Hann telur þar með forsendur fyrir endurupptöku málsins samkvæmt 24. grein stjórnsýslulaga.
Eins og áður sagði tók bæjarráð ósk Odds Helga fyrir á fundi sínum sl. fimmtudag, 3. september, og samþykkti að að fela bæjarlögmanni að kanna heimild til endurupptöku.
