Fara í efni
Fréttir

„Mikill samhljómur“ og formlegar viðræður

Á kjördag! Hilda Jana Gísladóttir, Samfylkingu, Hlynur Jóhannsson,  Miðflokki, Sunna Hlín Jóhannesdó…
Á kjördag! Hilda Jana Gísladóttir, Samfylkingu, Hlynur Jóhannsson, Miðflokki, Sunna Hlín Jóhannesdóttir, Framsóknarflokki og Heimir Örn Árnason, Sjálfstæðisflokki. Ljósmyndir: Skapti Hallgrímsson

Fulltrúar flokkanna fjögurra sem hittust í kvöld til að kanna möguleika á meirihlutasamstarfi í bæjarstjórn Akureyri hafa ákveðið að hefja formlegar viðræður; BDSM eins og hópurinn hefur verið kallaður eftir bókstöfum framboðanna! Þetta kemur fram í tilkynningu sem oddvitarnir sendu frá sér í kvöld.

Tilkynningin er svohljóðandi:

„Fulltrúar Sjálfstæðisflokks, Framsóknarflokks, Samfylkingar og Miðflokks á Akureyri funduðu nú í kvöld. Á fundinum var rætt um áherslur allra og kom í ljós að mikill samhljómur væri meðal fundarmanna í öllum helstu málum. Voru aðilar því sammála um að ástæða væri til þess að hefja formlegar viðræður þar sem áhersla verður lögð á farsæld barna, barnafjölskyldna, fólks í viðkvæmri stöðu og eldra fólks. Auk þess voru aðilar sammála um að leggja áherslu á umhverfis- og loftslagsmál, mannréttindi og velferð íbúa, öflugt skólastarf sem og metnaðarfull og fagleg skipulagsmál. Aðilar munu gefa sér góðan tíma til þess að vinna málefnasamning og skipta með sér verkum.

Heimir Örn Árnason
Sunna Hlín Jóhannesdóttir
Hilda Jana Gísladóttir
Hlynur Jóhannsson“