Fara í efni
Fréttir

Líkanið mun standa á gamalli hurð úr Húna!

Sigfús Ólafur Helgason, safnstjóri Iðnaðarsafnsins, Þorsteinn Pétursson Húnavinur og Elvar Þór Anton…
Sigfús Ólafur Helgason, safnstjóri Iðnaðarsafnsins, Þorsteinn Pétursson Húnavinur og Elvar Þór Antonsson líkanasmiður með hurðina góðu sem var í Húna þegar hann var sjósettur 1963. Ljósmynd: Skapti Hallgrímsson

Elvar Þór Antonsson á Dalvík hefur tekið að sér að smíða líkan af Húna II, eins og Akureyri.net greindi frá fyrr í dag. Líkanið verður afhjúpað um borð í skipinu 22. júní á næsta ári þegar nákvæmlega 60 ár verða liðin síðan Húni II var sjósettur. 

Svo skemmtilega vill til að hurð sem upphaflega var bakborðsmegin í stýrishúsi Húna II hefur varðveist og var notuð sem skrifborð í dag þegar Sigfús Ólafur Helgason, safnstjóri Iðnaðarsafnsins, og Elvar Þór, skrifuðu undir samning um smíði líkansins. Hurðinni var komið fyrir framan við Watnehúsið steinsnar frá Iðnaðarsafninu á Krókeyri.

Ekki nóg með það heldur verður hurðin nýtt áfram því líkanið af Húna II mun hvíla á henni þegar það verður til sýnis. Hurðin varð fyrir skemmdum á sínum tíma og Þorsteinn Pétursson og félagar í Hollvinafélagi Húna létu smíða nýja hurð eftir að skipið kom til Akureyrar. Þeir voru svo forsjálir að varðveita þá gömlu, sem mun nú koma að góðum notum.

Líkan afhjúpað á 60 ára afmæli Húna II