Fara í efni
Fréttir

Handbolti í hundrað ár – MYNDBAND

Handboltakappinn Alfreð Gíslason var kjörinn Íþróttamaður ársins af Samtökum íþróttafréttamanna 1989…
Handboltakappinn Alfreð Gíslason var kjörinn Íþróttamaður ársins af Samtökum íþróttafréttamanna 1989. Hann er eini Akureyringurinn sem hlotið hefur nafnbótina. Með Alfreð á myndinni er Sigríður Sigurðardóttir sem kjörin var Íþróttamaður ársins 1964 - fyrst kvenna og fyrst handboltamanna.

Í ár er öld liðin frá því handboltinn kom til Íslands, að því er segir í tilkynningu frá Handknattleikssambandi Íslands. „Það eru margar skemmtilegar vörður á þessari 100 ára leið og þau voru ófá brosin sem það kallaði fram að fara í gegnum gamalt myndefni tengt íþróttinni til að setja saman auglýsingu í tilefni þessa stóra áfanga,“ segir þar.

Svo skemmtilega vill til að fyrstu sekúndurnar í auglýsingu HSÍ eru úr Skemmunni á Akureyri; þar má m.a. sjá Halldór Rafnsson taka víti en Þorleifur Ananíasson og Stefán Tryggvason fylgjast með. Í húsinu er nú Ferro Zink með starfsemi, en Íþróttaskemman var lengi eina æfinga- og keppnishús íþróttamanna auk þess sem börn í Oddeyrarskóla og Glerárskóla stunduðu þar leikfimi.

„Sum augnablik gleymast aldrei, eins og þegar kvennalandsliðið braut blað í íþróttasögunni til að vinna titil í hópíþróttum árið 1964. Sama ár varð svo Sigríður Sigurðardóttir, landsliðskona í handbolta, fyrsta konan til að ná kjöri sem Íþróttamaður ársins. Við munum svo auðvitað öll eftir HM í handbolta sem var haldið á Íslandi 1995 og silfrið sem var öllu gulli betra á Ólympíuleikunum 2008,“ í tilkynningu HSÍ.

„Fjöldi barna og ungmenna hafa prófað sig áfram í íþróttinni á þessum langa tíma, óháð árangri trúum við að handboltinn og andinn innan íþróttarinnar fylgi þeim áfram út í lífið. Hreyfingin á svo sannarlega traustasta lið stuðningsmanna sem hægt er að finna og við hlökkum til að fylgja ykkur öllum næstu hundrað árin. Því eins og segir í nýju auglýsingunni okkar eru við rétt að byrja!“

Auglýsinguna sem HSÍ lét framleiða af þessum tímamótum má sjá hér.