Fréttir

Meistaraslagir í blaki og íshokkí á dagskránni

Haraldur Ingólfsson - haraldur@akureyri.net 03.10.2026 kl. 06:00

Fyrsti heimaleikur karlaliðs KA í blaki er á dagskrá í dag og hann ekki af verri gerðinni. Þar mætast Íslands- og deildarmeistarar síðasta tímabils þegar KA tekur á móti liði Hamars úr Hveragerði. Leik dagsins í íshokkí mætti einnig kalla meistaraslag því SA Víkingar sækja Íslandsmeistara SR heim í fjórða leik sínum í Toppdeildinni.

Blaklið KA í Unbroken-deild karla í blaki tapaði fyrir Þrótti í Reykjavík í fyrstu umferðinni, en nú er komið að heimaleik gegn deildarmeisturum síðasta árs. Þegar upp var staðið í vor voru það hins vegar KA-menn sem unnu Íslandsmeistaratitilinn eftir að hafa lent í 2. sæti í deildinni. Nánar er fjallað um blaklið KA í sér upphitunarpistli síðar í dag.
Erkifjendur takast á í Skautahöllinni í Laugardal í kvöl þegar SA Víkingar sækja Íslands- og deildarmeistara Skautafélags Reykjavíkur heim. SA Víkingar hafa unnið tvo af fyrstu þremur leikjum sínum, töpuðu fyrir Fjölni í fyrsta leik, en unnu síðan tvo örugga sigra gegn U20 liðinu. SR hefur unnið báða leiki sína til þessa, fyrst gegn U20 liðinu og síðan Fjölni núna fyrr í vikunni.

Hörkuslagur í boði í KA-heimilinu á laugardag þegar Íslandsmeistarar KA taka á móti deildarmeisturum Hamars í fyrri viðureign þessara liða um helgina.