Sverrir Páll

Garðar Atli komst í úrslit í spjótkasti á EM

Skapti Hallgrímsson skrifar 18. júlí 2026 | kl. 12:30

Garðar Atli Gestsson úr Ungmennafélagi Akureyrar tryggði sér í morgun sæti í úrslitum í spjótkasti á sínu fyrsta stórmóti – Evrópumeistaramóti 17 ára og yngri. Mynd: Skapti Hallgrímsson

Garðar Atli Gestsson úr Ungmennafélagi Akureyrar (UFA) komst í morgun í úrslit í spjótkasti á Evrópumeistaramóti 17 ára og yngri (EMU18) sem fram fer í Rieti á Ítalíu. Hann var nálægt sínum besta árangri; kastaði 64,94 metra í morgun en lengsta kast hans er 65,35 m sem tryggði Garðari Atla þriðja sæti og bronsverðlaun á Áskorendamóti Evrópu í Mónakó í lok maí.

Til að komast í úrslit á EM þurfti að kasta 67 metra eða vera í hópi þeirra 12 sem köstuðu lengst. Fimm rufu 67 m múrinn þannig að sjö aðrir komust áfram og Garðar Atli var sá 12. og síðasti inn í úrslit, næstur á eftir honum var Tyrki sem kastaði 70 sentimetrum styttra.

Ítalinn Antonio di Palma kastaði lengst í morgun, 73,28 m, Natan Kowalski frá Póllandi 69,96 og Finninn Jere Murto 69,86 m. Murto á lengsta kast allra í hópnum – spjót hans sveif 80,24 m fyrr á þessu ári.

Keppendur fengu þrjú köst í morgun, ekki sex eins og hefðbundið er á stórmótum. Garðar Atli kastaði 64,94 m í fyrstu tilraun, annað kast hans var ógilt og það þriðja mældist 63,11 m.

Keppt verður til úrslita í spjótkastinu á morgun.

Til baka í yfirlit