Sverrir Páll

Einlæg jólagleði á Minjasafninu

Skapti Hallgrímsson skrifar 15. desember 2025 | kl. 12:00

Myndir: Skapti Hallgrímsson

Fjöldi fólks hefur lagt leið sína á Minjasafnið á Akureyri á aðventunni og ekki kom á óvart að stór barnahópur mætti þangað á laugardaginn því auglýst hafði verið von væri á góðum gestum klukkan hálf þrjú – jólasveinum úr Dimmuborgum í Mývatnssveit, „ef þeir hafa lært á klukku,“ eins og sagði í tilkynningu frá safninu.

Bræðurnir úr Dimmuborgum vita augljóslega hvað tímanum líður því þeirra mættu á hárréttu augnabliki og sungu og trölluðu með börnunum í drjúga stund við undirleik Ívars Helgasonar.

Margir hafa komið í safnið undanfarið sem fyrr segir, m.a. 889 nemendur úr leik- og grunnskólum bæjarins, og nemendur af erlendum uppruna í Menntaskólanum á Akureyri.

Skemmtilegar jólasýningar standa nú yfir í Nonnahúsi, á Minjasafninu og Iðnaðarsafninu. Á Minjasafninu er til dæmis sýningin Verkstæði jólasveinsins sem var í Amaro-glugganum á árum áður. Sagt var frá henni í vikulegum pistli um safnkost bæjarins á akureyri.net fyrir skemmstu - sjá hér: Verkstæði jólasveinsins í Amaro. Söfnin eru opin daglega frá 13-16 og aðgangur er ókeypis fyrir fullorðna í fylgd með börnum!