Handbolti: Mikilvægur heimaleikur hjá KA/Þór

Kvennalið Akureyrar í handboltanum, KA/Þór, tekur á móti liði Hauka í mikilvægum leik í Olísdeild kvenna í kvöld kl. 19. 

KA/Þór tryggði sér endanlega sæti í úrslitakeppni Olísdeildar kvenna í handbolta með sigri á Selfyssingum í 17. umferðinni. Liðið er nú í 6. sæti deildarinnar með 15 stig og getur með góðum endaspretti klifrað eitthvað upp töfluna því næstu lið fyrir ofan, Fram, ÍR og Haukar, eru með 17, 18 og 19 stig.

Fjórar umferðir eru eftir af deildarkeppninni áður en úrslitakeppnin hefst og nánast öruggt að þessi fjögur lið endi í 3.-6. sæti nema eitthvað mikið gerist. Valur og ÍBV eru langefst í deildinni og ólíklegt að þau lið tapi öllum leikjum sem eftir eru. Fram undan er því barátta um röðun liðanna sem spila í fyrstu umferð úrslitakeppninnar. Sex efstu liðin leika í úrslitakeppninni og sitja liðin í 1. og 2. sæti hjá í fyrstu umferðinni. Liðið í 3. sæti mætir þá liðinu í 6. sæti og svo liðin í 4. og 5. sæti. Endanleg röð í deildinni skiptir því máli upp á mótherja og oddaleiksréttinn í úrslitakeppninni.

Haukar eru í 3. sæti deildarinnar með 19 stig, fjórum stigum meira en KA/Þór.

• Olísdeild kvenna í handbolta
  KA-heimilið kl. 19
  KA/Þór - Haukar

Liðin hafa mæst tvisvar í deildinni í vetur og höfðu Haukar sigur í bæði skiptin, 27-23 á Akureyri í október og 35-20 í Hafnarfirði í desember.