Þór fær íþróttahús – tekið í notkun 2031

Bæjarráð Akureyrar samþykkti í morgun samkomulag um uppbyggingu íþróttahúss – íþróttamiðstöðvar, eins og framkvæmdin er líka kölluð  – á félagssvæði Þórs í Glerárhverfi og fól bæjarstjóra að undirrita samkomulagið. Þar með er endanlega ljóst að langþráður draumur Þórsara verður að veruleika og öll starfsemi félagsins flyst á einn stað. Gert er ráð fyrir að húsið verði tilbúið til notkunar árið 2031.

Iðkendur hjá Þór stunda í dag æfingar á fimm stöðum í bænum utan félagssvæðisins. Í minnisblaði um verkefnið kemur fram að félagið búi við þá sérstöðu að 45% af iðkendum á aldrinum 5 til 19 ára geti ekki sótt æfingar á Þórssvæðinu.

Gólfflötur íþróttasalarins verður 2.300 - 2.500 fermetrar og mun rúma tvo löglega handboltavelli. Í byggingunni verður aðstaða fyrir allar deildir Þórs, samkomusalur, skrifstofur og fundarrými, svo sumt sé nefnt. Nánar um það hér að neðan.

Frumkostnaðaráætlun gerir því ráð fyrir að mannvirkið kosti frá 3 milljörðum til 4,5 milljarða á verðlagi janúar 2026.

Í drögum að samkomulagi og minnisblaði sem fylgja fundargerð bæjarráðs í morgun er margt áhugavert. Hér eru dæmi:

• Íþróttafélagið Þór býr við þá sérstöðu í dag að um 45% af iðkendum félagsins á aldrinum 5-19 ára geta ekki sótt æfingar félagsins á félagssvæði Þórs við Skarðshlíð.
• Þessir iðkendur æfa og keppa í Íþróttahöllinni, Íþróttahúsi Síðuskóla, Íþróttamiðstöð Glerárskóla, Íþróttahúsi Laugargötu og Íþróttahúsi Oddeyrarskóla.
• Þörf er á íþróttahúsi á Akureyri sem hefur gólfflöt sem rúmar tvo löglega handboltavelli og myndi gera skipulagðri íþróttastarfsemi barna og ungmenna kleift að skipuleggja æfingar fyrr á daginn ...
• ... og myndi þannig stytta vinnudag barna og um leið draga stórlega út æfingum ungmenna eftir klukkan 20:00.
• Slíkt íþróttahús myndi geta tekið fleiri æfingahópa í húsið á hverjum æfingarklukkutíma en þekkist á Akureyri í dag ...
• ... og um leið losa tíma í öðrum íþróttamannvirkjum sem aðrir gætu notað og nýtt fyrr á daginn sem og aðrir og almenningur seinni part dags og á kvöldin.
• Gera má ráð fyrir því að uppbygging íbúðahverfis í Móahverfi hafi í för með sér varanlega fjölgun iðkenda hjá Þór á næstu árum. Því er mikilvægt að horfa til þess að félagið verði tilbúið að taka á móti stærri hópi iðkenda þegar fram líða stundir á félagssvæði Þórs.
• Í íþróttasalnum verða áhorfendabekkir og öll aðstaða eins og best verður á kosið fyrir leiki í efstu deild í meistaraflokki í körfubolta og handbolta, sem og mótahald yngri flokka.
• Í íþróttahúsinu verður gert ráð fyrir lyftingasal og að mannvirkið verði tengt við stúkuna við Þórsvöll og félagsheimilið Hamar.
• Í mannvirkinu verður hægt að halda fjölbreytta viðburði auk íþróttaiðkunar og keppnishalds – talað er um samkomur, veisluhald og tónleika.
• Á félagssvæði Þórs eru nú félagsheimilið Hamar, stúkubygging, frjálsíþróttavöllur, grasvöllur, gervigrasvöllur og knattspyrnuhús. Þau mannvirki auk nýs íþróttahúss eiga að mynda sterka heild fyrir íþrótta- og félagsstarf Íþróttafélagsins Þórs og önnur þau íþróttafélög sem hafa aðsetur á félagssvæði Þórs.
• Frumkostnaðaráætlun gerir því ráð fyrir að íþróttamiðstöðin kosti frá 3 milljörðum til 4,5 milljarða á verðlagi janúar 2026.

Fjárveitingar til verkefnisins verða sem hér segir, skv. framkvæmdaráætlun Akureyrarbæjar 2026-2029:

• Árið 2026 – 40 milljónir kr.
• Árið 2027 – 50 milljónir
• Árið 2028 – 600 milljónir
• Árið 2029 – 900 milljónir

„Áframhaldandi uppbyggingu öflugrar íþróttaaðstöðu á félagssvæði Þórs tryggir hagkvæmari nýtingu innviða og skapar mikilvægan vettvang fyrir fjölbreytta íþróttaiðkun og heimili fyrir félagið þegar horft er til langs tíma,“ segir í minnisblaði Akureyrarbæjar.

Smellið hér til að sjá fundargerð bæjarráðs frá því í morgun.

Málið er 5. liður á dagskránni. Þar má sjá bæði drög að samkomulagi og minnisblað sem ritað var fyrir fræðslu- og lýðheilsuráð, umhverfis- og mannvirkjaráð og bæjarráð.