Dæmdi á Akureyri 2013 – dæmir úrslitaleik EM

Úrslitaleikur Evrópumóts kvennalandsliða í knattspyrnu fer fram í dag. Þar mætast Evrópumeistarar Englands og heimsmeistarar Spánar. Leikurinn fer fram á St. Jakob-Park í Basel í Sviss og hefst kl. 16. 

Þegar rýnt er í knattspyrnusöguna má finna örlitla tengingu við Akureyri í úrslitaleiknum og nokkrar að auki í mótinu sjálfu. Sterkasta tengingin við Akureyri er auðvitað landsliðskonan okkar Sandra María Jessen, sem var í byrjunarliði Íslands í öllum leikjum liðsins í riðlinum og stóð sig vel í sínu hlutverki.

Akureyrarvinkill á úrslitaleiknum tengist ekki liðunum sjálfum heldur dómara leiksins í dag, hinni frönsku Stephanie Frappart. Hún hefur getið sér gott orð sem dómari, en hún hóf ferilinn sem alþjóðadómari 2009 og hefur dæmt á fjölda stórmóta og dæmt fjölda stórleikja undanfarinn áratug. 

Stephanie Frappart dæmdi nefnilega Evrópuleik á Þórsvellinum miðvikudaginn 9. október 2013 þegar Þór/KA tók á móti rússneska liðinu Zorkij í 32ja liða úrslitum Meistaradeildar Evrópu. Sandra María var í byrjunarliði Þórs/KA í þeim leik. Um sex árum síðar varð Frappart svo fyrst kvenna til að dæma úrslitaleik í karlaflokki á vegum UEFA þegar hún dæmdi leik Evrópumeistara Liverpool og Evrópudeildarmeistara Chelsea um ofurbikar Evrópu haustið 2019 og braut svo annað blað í knattspyrnusögunni rúmu ári síðar þegar hún varð fyrst kvenna til að dæma leik í Meistaradeild Evrópu í karlaflokki. 

Ef vel er að gáð má svo finna fleiri tengingar við Akureyri á EM, fyrir utan okkar konu og þann fjölda fólks sem fór héðan til að styðja íslenska liðið. Danska landsliðskonan Pernille Harder var leikmaður Wolfsburg 2018 þegar liðið mætti Þór/KA á Þórsvellinum 12. september. Hún var í leikslok verðlaunuð sem maður leiksins og fékk að launum gjafabréf á Greifann. Harder skoraði í báðum leikjunum gegn Þór/KA. Pólska landsliðskonan Ewa Pajor var einnig leikmaður Wolfsburg 2018 þegar liðið mætti Þór/KA í 32ja liða úrslitum Meistaradeildar Evrópu. Báðar spiluðu þær með sínum landsliðum á EM sem lýkur í dag.

Ef kafað er enn dýpra mætti finna þekktar knattspyrnukonur sem voru mögulega einhvern tímann á leið til Akureyrar til að spila fyrir Þór/KA, eða voru til skoðunar hjá þjálfara liðsins. Hverjar það voru verður ekki upplýst hér enda aðeins um þreifingar og möguleika að ræða, sem ekki varð úr.