Þórsarar rótburstuðu Fjölnismenn á útivelli
Þórsarar gjörsigruðu lið Fjölnis, 5:0, á útivelli í kvöld í 10. umferð Lengjudeildarinnar, næst efstu deildar Íslandsmótsins í knattspyrnu. Þórsliðið er í fjórða sæti deildarinnar með 17 stig, HK hefur 18, Njarðvík 20 og ÍR er á toppnum með 22 stig.
Þór hafði mikla yfirburði í Grafarvoginum í kvöld. Ibrahima Balde, miðjumaðurinn firnasterki, gerði þrennu; skorað fyrst eftir aðeins sex mínútur, aftur á 42. mín. og hann skoraði þriðja sinni á 78. mín. Breytti stöðunni þá í 4:0 því skömmu áður hafði Hermann Helgi Rúnarsson komið Þór í 3:0. Aron Ingi Magnússon gerði fimmta og síðasta markið nokkrum mín. fyrir leikslok.
Markvörður Fjölnis var rekinn af velli á 62. mín. fyrir að fella Balde sem kominn var einn inn fyrir vörnina. Snemma í leiknum var Fjölnismaðurinn Óskar Dagur Jónasson heppinn að sleppa með gult eftir afleita tæklingu; sparkaði gróflega í Vilhelm Ottó Biering Ottósson, vinstri bakvörð, sem fór meiddur af velli. Fjölnismenn hefði ekki getað kvartað þótt rauða spjaldið hefði einnig farið á loft þá.
Nánar á morgun
