Toppslagur Þórsara og Njarðvíkinga í dag

Þórsarar fá Njarðvíkinga í heimsókn í dag í sannkölluðum toppslag Lengjudeildarinnar, næst efstu deildar Íslandsmótsins í knattspyrnu. Þegar 18 umferðum er lokið af 22 er lið Njarðvíkur efst með 37 stig og Þórsarar í öðru sæti með 36 stig.

Leikurinn hefst klukkan 16.00 í Boganum. Gera má ráð fyrir fjölmenni þar og mikilli stemningu því Þórsarar hafa verið á góðri siglingu undanfarið; þeir töpuðu síðast fyrir Þrótti 3. júlí en hafa síðan unnið sex leiki og gert eitt jafntefli. Þór vann ÍR 1:0 á útivelli í síðustu umferð, og komst þar með upp fyrir ÍR, en lið Njarðvíkur tapaði heima fyrir Þrótti í 18. umferðinni

• Lengjudeild karla í knattspyrnu, 19. umferð
  Boginn kl. 16
  Þór - Njarðvík

Tveir Þórsarar verða fjarri góðu gamni í dag; miðjumaðurinn Ibrahime Balde, algjör lykilmaður hjá Þór, og hægri bakvörðurinn Juan Guardia Hermida eru báðir í leikbanni. Þeir fengu áminningu þegar Þór sigraði Völsung á dögunum – fjórða gula spjald hvors um sig í sumar, og þeir fóru þar með í eins leiks bann.

Njarðvík vann fyrri leik þessara liða á heimavelli um miðjan júní, 3:1.

Lokaspretturinn í deildinni verður væntanlega æsispennandi. Efsta liðið að loknum 22 umferðum vinnur sér sæti í Bestu deildinni eins og áður hefur komið fram, og liðin í 2.-5. sæti fara í umspil um annað laust sæti í efstu deild. Nú eru 12 stig í pottinum og sex lið sem eiga enn möguleika á að fara upp.

Leikir sem efstu liðin eiga eftir, að 19. umferðinni í dag meðtalinni:

• Njarðvík 37 stig – Þór (ú), Leiknir (h), Keflavík (ú), Grindavík (h)
• Þór 36 stig – Njarðvík (h), Selfoss (ú), Fjölnir (h), Þróttur (ú)
• Þróttur 35 stig – Selfoss (h), Fjölnir (ú), HK (ú), Þór (h)
• ÍR 33 stig – Leiknir (ú), Keflavík (h), Grindavík (ú), Fylkir (h)
• HK 31 stig – Fjölnir (ú), Fylkir (h), Þróttur (h), Völsungur (ú)
• Keflavík 28 stig – Völsungur (h), ÍR (ú), Njarðvík (h), Selfoss (ú)

Staðan í deildinni