Áskorun um snyrtingu gróðurs á lóðarmörkum

Akureyrarbær skorar er á lóðarhafa og umráðendur lóða að snyrta gróður sem nær út fyrir lóðarmörk að götum, gangstéttum og stígum. Of mikill gróður getur hulið umferðarskilti, byrgt fyrir götulýsingu, torveldað gangandi og hjólandi vegfarendum að komast leiðar sinnar, og valdið ýmiss konar vandræðum fyrir sorphirðu, slökkvilið, sjúkrabíla og snjómokstur, eins og fram kemur í tilkynningu á vef bæjarins.

Bent er á að ef gróður vex út fyrir lóðarmörk þá geta hlotist af því óþægindi og jafnvel hætta fyrir gangandi, hjólandi og akandi vegfarendur, auk þess sem það getur valdið tjóni á tækjum og bifreiðum. Til að tryggja umferðaröryggi og fyrirbyggja slys má krefja lóðarhafa um úrbætur og verði ekki orðið við þeim innan 10 daga má snyrta og klippa góður sem nær út fyrir lóðarmörk á kostnað lóðareigenda án frekari fyrirvara með vísan til byggingarreglugerðar nr. 112/2012.

Akureyrarbær óskar eftir góðri samvinnu allra um að tryggja almenningi greiða leið og skapa umhverfi sem dregur úr líkum á slysum. Allar nánari upplýsingar má fá hjá umhverfis- og mannvirkjasviði Akureyrarbæjar.