Um 250 nýnemar hefja nám við VMA

Fyrsti kennsludagur í Verkmenntaskólanum á Akureyri samkvæmt stundaskrá var í gær. Um 870 nemendur eru skráðir í dagskóla í upphafi annar að því er kemur fram á vef skólans. Við það bætast nemendur í fjarnámi, en umsóknarfresti til að sækja um fjarnám lýkur á morgun. Nýnemar við skólann eru um 250.

„Sem fyrr eru margar námsbrautir skólans þétt setnar og á það ekki síst við um hinar ýmsu verknámsbrautir. Auk náms í dagskóla verður í vetur kvöldskóli í bæði rafiðn og húsasmíði. Í rafiðn byrjaði þessi námshópur um síðustu áramót en nýr námshópur, þriðji kvöldskólahópurinn, hefur nú nám í húsasmíði. Nýr námshópur hefur einnig nám núna á haustönn í matartækni. Sem fyrr hefur Marína Sigurgeirsdóttir umsjón með náminu sem verður kennt í lotum,“ segir í frétt á vef skólans. 

Tekið var á móti nýnemum í VMA á þriðjudag. Nýr skólameistari, Benedikt Barðason, ávarpaði nýnemana og forráðamenn þeirra, en að því búnu fóru nemendur með umsjónarkennurum sínum og fengu upplýsingar um skólastarfið fram undan. 

Hilmar Friðjónsson kennari við skólann tók nokkrar myndir við þetta tækifæri og má finna þær í frétt á vef skólans.