Birgir Orri Ásgrímsson

Lögreglan: Mikill erill – 83 mál, 13 handteknir

Haraldur Ingólfsson skrifar 02. ágúst 2026 | kl. 08:00

Handtökur fóru fram í umfangsmikilli lögregluaðgerð með aðstoð sérsveitarmanna í Glerárgötu í gærkvöld, í næsta nágrenni við Akureyrarvöll þar sem fjöldi manns var á tónleikum. Þetta kemur fram í frétt mbl.is núna í morgun. Mikill erill var hjá lögreglu að því er fram kemur í tilkynningu frá Lögreglustjóranum á Norðurlandi eystra á Facebook-síðu embættisins í morgun. Alls voru 83 mál skráð hjá lögreglu síðastliðinn sólarhring.

Samkvæmt frétt mbl.is stöðvaði lögregla för fólksbíls og mátti ráða af myndum að fjórir hafi verið handteknir. Í tilkynningu lögreglu um kl. 8 í morgun kemur fram að fjórir einstaklingar hafi verið handteknir vegna fíkniefnalagabrots, einn þeirra vistaður í fangageymslu og að málið sé til rannsóknar. Ekki er þó tekið fram að þær handtökur hafi farið fram í Glerárgötunni með aðstoð sérsveitarmanna, né heldur er sú aðgerð nefnd sérstaklega í tilkynningunni.

Helstu verkefni síðasta sólarhring hjá lögreglunni á Akureyri, samkvæmt tilkynningunni:

Átta mál komu upp vegna ölvunar eða vímuástands og þurftu tveir aðilar að gista í fangageymslu.
Fimm mál komu upp þar sem afskipti voru höfð af börnum vegna ástands, barnavernd og forendar upplýst.
Tíu umferðarlagabrot voru skráð síðastliðinn sólarhing hjá lögreglu, en ekkert tilfelli kom upp þar sem grunur var um akstur undir áhrifum vímugjafa.
Ein líkamsárás var tilkynnt og er það mál til rannsóknar.
Níu einstaklingar handteknir og einn þeirra og vistaður í fangageymslu vegna vopnalagabrots á tónleikasvæðinu á Akureyrarvelli, það mál einnig til rannsóknar.
Fjórir einstaklingar handteknir vegna fíkniefnalagabrots, einn þeirra vistaður í fangageymslu og málið til rannsóknar.

Til baka í yfirlit